Vendosur në Troshan të Lezhës, Z. Vlash Ndreca është një i ri fermer me shumë ambicie në sektorin e vreshtarisë dhe pemtarisë. Gjatë vizitës në pemtoren e tij me zerdeli, shegë, mollë, kumbulla dhe rrush të varieteteve të ndryshme, Vlashi tregon me shumë pasion se pas kthimit nga Greqia, vendosi të zbatojë njohuritë e fituara në pemtoren e tij. 
Prej dhjetë vitesh, Vlashi ka ndërtuar një marrëdhenie të shëndoshë biznesi me agro-turizmin më të suksesshëm të zonës, “Mrizi i Zanave”. Ai është mirënjohës dhe shprehet se ky bashkëpunim e ka ndihmuar të rrisë aktivitetin e tij, si dhe të ketë një treg të sigurt.

Vlashi, jo vetëm realizon me sukses të gjitha shërbimet agro-teknike të pemëtores së tij dhe madje ndihmon fermerët e zonës sa herë u nevojitet. Të gjitha punët në pemtore, si kultivimin, shartimin, krasitjen, vjeljen dhe tregtimin e prodhimit, ai i realizon së bashku me bashkëshorten dhe fëmijët e tij.

Vlashi na siguroi se çdo rrënjë peme apo hardhie është planifikuar të mbillet, duke respektuar nevojat për ujë, diell apo distancën e duhur për një prodhim të mbarë. Në planet e tij është gjithashtu zgjerimi i bllokut të tij të pemtores dhe vreshtit. Me ngritjen e vreshtit të ri, Vlashi është optimist se tregtimi i rrushit organik do të shtojë të ardhurat e biznesit të tij familjar.

Vlashi, jo vetëm është regjitruar në platformën ABA Online, por shprehet se informacioni që ofron platforma mbi pemtarinë dhe vreshtarinë është shumë i vlefshëm për të.

“Duhet të vini në Maj kur lulet e pemëve çelin duke krijuar një mozaik ngjyrash me aroma dehëse”,- shprehet Vlashi.