Sëmundja e varroatozës për nga rëndësia e problematikave të bletarisë zë vendin e parë në nivel botëror. Luftimi i saj me preparate me bazë natyrale i hap rrugën prodhimeve organike në bletari. 

Kush janë preparatet me bazë natyrale që mund të përdoren në luftimin e Varroatozës? 

Preparatet ndahen në dy grupe:

Grupi i pare: VAJRAT ESENCIALE 
Ku nga më të rëndësishmit dhe më të përdorurit gjerësisht është TIMOLI.

TIMOLI është përbërësi i vajrave që përdoret më gjerësisht në luftën kundër Varroas. Timoli është testuar në forma të ndryshme duke u përdorur si pluhur, lëng i përthithur në sfungjere sintetike që vendosen mbi kornizat, me efekte shumë të mira. Timoli lë sasi të mëdha mbetjesh kryesisht në dyll, ku fiksohet jo shumë fort e që më pas avullon për një kohë të shkurtër.
Kujdes se një lëndë e tillë  (TIMOLI) kur përdoret në temperatura mbi 28°C mund të japë shqetësime në bletë.

DISA NGA PREPARATET KOMERCIALE ME BAZË TIMOLI 

APILIFE (Timol, Mentol, Eukaliptol, dhe Kamfor). Është një formulim që ngjan me “biskotat” prej vermikuliti të mbushura secila me nga rreth 20 gr nga kjo përzierje me prevalencë të timolit 74- 76%. Gjatë gjithë trajtimit përdoren tre “biskota” për zgjua në intervalet 10-të ditë njëra nga tjetra. Në kushte optimale mund të japë efektshmëri 90-95%, por me një farë ndryshueshmërie rezultatesh në zgjoje të ndryshme brenda parkut të bletëve. Ndonjëherë jep prishje të ekuilibrit të brendshëm të kolonive, me pasojë bllokimin e pjellës, të cilat vërehen në kushtet e avullimit të lartë. 

Duhet patur kujdes për të shmangur problemin më të madh që paraqet timoli, i cili është shtimi i avullimit me rritjen e temperaturave, do të ishte me vend që të shmangej përdorimi i këtij preparati veçanërisht në periudhat e nxehta (> 27-30°C). 

Një zgjidhje të mirë në këtë drejtim e ka dhënë formulimi në preparatin APIGUARD, ku timoli është i inkluduar në xhelatinë, duke bërë të mundur avullimin e ngadaltë dhe të njëtrajtshëm të lëndës aktive. Rezultatet e këtij formulimi janë shumë të mira duke përdorur dy vasketa në çdo 15 ditë secila (pra trajtimi zgjat gjithsej 30 ditë). 

Klikoni këtu nëse dëshironi të dini më shumë mbi trajtimin e bletëve kundër varroatozës.