Në fund të periudhës së dimrit dhe gjatë pranverës familjeve të bletëve duhet t’u sigurohen konditat e nevojshme për zhvillimin normal të tyre. Kjo duhet bërë duke patur parasysh fuqinë e familjes si dhe periudhën në të cilën bëhen punimet përkatëse.

Kontrolli kryesor pranveror
Ka për qëllim vendosjen e familjeve të bletëve në kushte më të mira që ato të zhvillohen shpejtë dhe në kohën e kullotës kryesore të jenë sa më të forta. Që familjet e bletëve të arrijnë një zhvillim të mirë duhet të kenë:

• Mëmë të cilësisë së mirë
• Rezerva ushqimore të mjaftueshme
• Një sasi të mjaftueshme mize të dalë nga dimri
• Hoje të cilësisë së mirë, zgjoj të mirë që evitojnë humbjen e ngrohtësisë. 

Kontrolli kryesor kryhet kur temperatura në hije nuk është më e ulët se 14°C.
Është një nga kontrollet më të rëndësishme që bëhet në familjet e bletëve, nga mënyra dhe kujdesi se si kryhet si dhe nga masat që merren pas kryerjes së tij, varet jo vetëm zhvillimi i këtyre familjeve por edhe prodhimtaria e tyre.

Në këtë kontroll, për çdo familje vlerësohen:

1. Gjëndja dhe zhvillimi i përgjithshëm i familjes
2. Prania e mëmës dhe cilësia e saj
3. Prania dhe gjëndja e gjeneratës
4. Sasia dhe cilësia e rezervave ushqimore
5. Gjëndja e hojeve dhe e folesë
6. Gjëndja shëndetësore e folesë në tërësi dhe si banesë

• Mëma dhe cilësia e saj. Pasi gjendet mëma pa e kapur atë shohim së mos ka ndonjë të metë trupore, këmbë ose krahë të thyer ,etj. 
  Për cilësinë e mëmës gjykojme nga mënyra e vendosjes së pjelljes. Kur ka shume pjellë dhe është e shpërndarë uniformisht, mëma konsiderohet e mirë në të kundërtën kur në fole ka ushqim mjaftueshëm dhe pjella është e pakët dhe e çrregullt, çka flet për një mëmë jo të mirë, ajo duhet zëvendësuar.
• Përcaktimi dhe vlerësimi i rezervave ushqimore. Gjatë dimrit bletët ndodhen në  një gjëndje qetësie dhe konsumi i ushqimit nga ana e tyre është shumë i pakët, kurse me shfaqjen e vezëve dhe larvave të para temperatura në fole rritet. Në këtë periudhë çdo familje e mirë bletësh duhet të ketë rreth 8 kg mjaltë. Dhe në asnjë mënyrë kjo sasi nuk duhet të bjerë nën 6 kg deri në fillimin e kullotës. (Nje kornizë e madhe e zgjoit tonë e mbushur nga të dy anët përmban 2-2.5 kg mjaltë). Në qoftë së familjet e bletëve nuk i kanë rezervat ushqimore në sasinë e duhur atëhere ato patjetër duhen ushqyer për t’i plotësuar ato.
• Përcaktimi i forcës së familjes. Kjo gjykohet nga sasia e bletëve që janë në fole e konkretisht nga numri i rrugëve të mbushura me bletë. Forca e folesë vlerësohet si më poshtë:

1. Familje të dobëta kur kanë më pak se 4 rrugë mizë.
2. Të mesme kur kanë 5-6 rrugë mizë
3. Të forta kur kanë 6-7 rrugë mizë
4. Shumë të forta kur kanë 9-10 rrugë mizë

Familjet e dobëta duhen bashkuar. 

• Gjëndja e folesë dhe e zgjoit si banesë. Në këtë kontroll rëndësi i kushtohet cilësisë së hojeve që janë në zgjua. Që t’i jepet mundesi mëmës të pjellë sa më shumë vezë, gjë që do të ndikojë në formimin e familjes në këtë periudhë vendosen hoje me qeliza që kanë përmasa për bletë punëtore e hiqen hojet e bardha të lëna në vjeshtë me mjaltë si dhe largohen hojet e vjetra. Rëndësi në këtë periudhë ka ruajtja e ngrohtësisë së brendëshme të familjes. Të gjitha familjet që kanë deri në 5 rrugë mizë ngushtohen me anën e dërrasave ndarëse dhe lihen vetëm kornizat me mizë (që mbulohen me mizë).

• Hiqen kornizat me hoje të vjetra e të mykura, të dëmtuara, të ndërtuara keq, me shenja diarreje etj. Ndërmjet tavanit dhe kornizave vendosen tabakë fibrash sintetike që nuk lejojnë hyrjen e lagështirës dhe që e mbajnë ngrohtë folenë dhe në kufijtë anësorë të kornizave të zgjoit vendosen dërrasa ndarëse. Gjatë ngushtimit të zgjoit duhet që pjesa ku spostohet miza të mos jetë e ekspozuar nga veriu. Me ngrohjen e kohës masat e marra për sigurimin e ngrohtësisë ndërpriten. Vëmendje duhet t’i kushtohet dhe vetë zgjoit si banese. Zgjoi i vjeter hiqet dhe zëvendësohet me një tjetër të cilit i është pastruar dyshemeja a grimcat e dyllit dhe bletët e vdekura, si dhe i është  kryer dezinfektimi me flakë blu ose dezinfektantë specifikë.