Punimi i tokës. Me anë të punimit bëhet përmbysja e plehrave të përdoruara në plehërimin bazë (organik dhe mineralë), eliminohen barërat e këqija si dhe ruhet vlaga e tokës. Punimi bëhet gjatë periudhës vjeshtë-dimër dhe aplikohet kryesisht në tokat fushore dhe nën ujë. Punimi duhet të jetë i cekët, rreth 15 - 20 cm thellësi, për të mos dëmtuar sistemin rrënjor. Në tokat me pjerrësi mbi 5% dhe ku mundësia e ujitjes është e kufizuar, këshillohet të mos punohen por të mbahet të pastra nga barishtet e këqija (të paktën deri në 70 cm nga trungu) nëpërmjet aplikimit të herbicideve (për të penguar erozionin). Ne sipërfaqen ndërmjet bimëve këshillohet mulçërimi (vendosja e lëndëve organike si barë, byk, gjethe të thara, tallash, torfe, etj,) me qëllim që të eliminohet largimi i ujit nëpërmjet avullimit.

Ujitja. Periudhat më kritike dhe kërkesat më të mëdha për ujë  janë:

- në fazën e lulëzimit; 

- në fazën e lidhjes së frutave;

- në fazën e rritjes intensive të frutave.

Këshillohet aplikimi i sistemit të ujitjes me pika. Duhet pasur parasysh që sasia e ujit për një periudhë vegjetative është rreth 2000-3000 m3 për ha.

Plehërimi. Veç plehërimit të përvitshëm është e domosdoshme, që gjatë përgatitjes së tokës për mbjellje, ajo duhet të plehërohet me rreth 500 kv/ha plehra organike, 10-15 kv/ha plehra fosforike, 5-6 kv/ha plehra potasike, etj. 

• Në vitin e parë të kultivimit plehërimi azotik duhet të jetë rreth 150 g. lëndë aktive azotike (N) për bimë (pemë) ose  500 g pleh/pemë  dhe në vitin e dytë të kultivimit kjo sasi duhet të dyfishohet.
• Këshillë! Plehu duhet të shpërndahet në mënyrë uniforme nën të gjithë kurorën e pemës dhe të përmbyset në tokë gjatë shkrifërimeve të sipërfaqes të sajë. 
• Në vitin e tretë të kultivimit duhet të shtohen  rreth 50-70 kg/ha lëndë aktive  plehra fosforike dhe 100 kg/ha  potasike.
• Në tokat e gëlqerëzuara sasia e plehrave fosforike duhet të rritet deri në 150 kg/ha. Këto duhet të hidhen në të gjithë sipërfaqen e tokës dhe mundësisht në punimin e vjeshtës.
• Gjatë periudhës së prodhimit, plehrat azotike duhet të jenë nga 150 kg/ha deri në 180 kg/ha lëndë aktive azotike dhe duhet të shpërndahen në disa duar gjatë vegjetacionit.

Klikoni këtu nëse dëshironi të dini më shumë për Mbrojtja nga sëmundjet dhe dëmtuesit tek kumbulla