Me fillimin e stinës së verës dhe rritjen e temperaturave, rriten edhe mundësitë për shfaqjen e sëmundjeve tek viçat, pasi moti i nxehtë ndikon në stresin e viçave, uljen e aftësisë për marrjen dhe përvetësimin e ushqimit dhe uljen e imunitetit. Në kushtet e motit të nxehtë dhe të lagësht, viçat konsumojnë më shumë ujë, konsumojnë më pak qumësht dhe mund të dehidratohen (thahen nga uji) më shpejt, gjë e cila sjell përkeqësimin e sëmundjeve. Gjatë ditëve me temperatura të larta, viçat përdorin më shumë energji për uljen e temperaturës së trupit të tyre, duke bërë që të mbetet më pak energji për rritje dhe imunitet. Ato kalojnë në gjendjen e stresit nga vapa, pasi qëndrojnë më shumë mbi gjymtyrë, shtrihen më pak dhe shpeshtojnë frymëmarrjen. Gjithashtu nëse nuk sigurohet higjiena e duhur, temperaturat e larta sjellin rritjen e baktereve në burimet ujore, në pajisjet e makineritë e qumështit, në shtratin e viçave dhe ambientet e stallës në përgjithësi. 

Ndaj, në kushtet e temperaturave të larta, bëni kujdes të vëzhgoni sëmundjet që lidhen me to, të cilat mund të krijojnë një seri problemesh, sikurse janë dy nga sëmundjet më kritike që lidhen me motin e nxehtë: 

• Diarreja, pasi dehidratimi, acidoza dhe stresi i bëjnë viçat më të prekshëm
• Sëmundjet e frymëmarrjes, pasi stresi nga vapa dhe qarkullimi i dobët i ajrit ulin imunitetin e viçave

Pra, moti i nxehtë, nuk krijon sëmundje në mënyrë të drejtpërdrejtë, por ndikon në uljen e rezistencës së viçave dhe rritjen e dehidratimit e rrezikut të prekjes nga sëmundjet, ndaj sëmundjet si diarreja dhe pneumonia bëhen më të pranishme. Në kushtet e motit të nxehtë ju këshillojmë:

• ti ofroni viçave ujë të bollshëm, të freskët dhe të pastër gjatë të gjithë kohës për pirje të lirë
• të krijoni ose përmirësoni ambiente të hijezuara dhe të ventiluara mirë
• të ulni ngarkesën e viçave në bokset e qëndrimit të tyre
• të mbani shtratin e viçave sa më të pastër, e të thatë
• të pastroni dhe dezinfektoni në mënyrë të rregullt pajisjet që përdoren për të ushqyerit, si dhe pajisje të tjera pasi moti i ngrohtë nxit shtimin e baktereve
• vëzhgoni viçat nga afër për frymëmarrje të shpeshtuar (gulçime), ulje të oreksit, si dhe çdo shenjë dehidratimi e diarreje.

Klikoni këtu në se dëshironi të dini më shumë lidhur me diarreja - shkaqet, shenjat, parandalimi dhe kurimi