Shërbimet agroteknike në kohë ndikojnë në rritjen e prodhimin dhe cilësinë e tij. Shërbimet  kryesore në vitin e parë pas mbjelljes e në vazhdim konsistojnë në krasitjen, luftimin e barërave të këqija, plehërimin, ujitjen dhe mbrojtjen nga sëmundjet dhe dëmtuesit. 

Krasitja: Në pranverë duhet të bëhet zgjedhja e lastarëve më të mirë dhe të bëhet lidhja e tyre për teli. Çdo lastarë në prodhim shkurtohet me prerje të pjerrtë në lartësi 2 m. Në 1m gjatësi të rreshtit duhet të jenë 5 - 7 lastarë. Lastarët e thyer dhe të dëmtuara shkurtohen dhe largohen.

Proces i rëndësishëm është edhe heqja e lastarëve të rinj. Të gjithë lastarët e rinj që dalin në pranverë, 15 – 30 maj,  largohen deri në nivel të sipërfaqes së tokës. Pas muajit maj lastarët lihen që të rriten dhe përgatiten për vitin e ardhshëm.

Plehërimi i mjedrës në prodhim: Mbështetur në analizat e tokës dhe sasia e prodhimit të planifikuar për plehërimin bazë të  mjedrës rekomandojmë:

• pleh stalle i kalbur me dozën 10 - 15 ton/ha;
• plehrat kimike komplekse NPK (5:20:30, 5:22:35, 6:26:26, 7:14:21, 10:20:30) përdoren me dozën 15-25 kv/ha.

Plehërimi plotësues i mjedrës mund të bëhet me plehra kokrrizor (të granuluar) plehrat kristalorë me ujitjen dhe  mikroelementet të cilët përdoren në plehërim gjethor. Pjesa më e madhe e plehërimit në të gjitha metodat varet nga përmbajtja e lëndëve ushqyese në tokë, natyra e tokës dhe potenciali ekzistues i sistemit për ujitje. Nëse nuk ekziston sistemi ujitës me pika plehërimi mund të bëhet me shpërndarjen e plehut të stallës së bashku me plehrat kimikë të granuluar (kokrrizuar).

Më të rëndësishëm për mjedrën janë tre elemente: azoti (N), kaliumi (K), dhe fosfori (P). Azoti në vitin e parë duhet përdorur përafërsisht 35 kg azot/ha. Përdorimi i plehrave minerale në vitin e parë duhet evituar deri në shfaqjen e lastarëve, sepse bimët e reja të mjedrës janë shumë të ndjeshme dhe mund të dëmtohen nga përqendrimi i shtuar i kripërave në tokë. 

Në vitet e ardhshme, për llojet dyvjeçare të mjedrës, përdoret azot (N) në sasi 75 kg/ ha, ndërsa për llojet njëvjeçare përdoret azot 110 kg/ha. Fosfori duhet të përdoret për çdo vit në sasi 25 – 30 kg/ha. Kaliumi duhet të përdoret për çdo vit në sasi 50 – 60 kg/ha. Në mjedrat dyvjeçare plehërimi duhet të bëhet dy ose tri herë në vit.

Ujitja e mjedrës duhet të sigurohet në mënyrë të njëtrajtshme gjatë tërë periudhës së vegjetacionit. Sistemi  i ujitjes me pika është sistemi nga i cili uji lirohet në afërsi të bimës. Ky sistem përdoret me sukses edhe në vende të pjerrëta dhe siguron  shpërndarjen e mirë dhe uniforme të ujit. 

Nuk rekomandohet ujitja me ujë të shpejtë dhe me sasi të tepruara, sepse sasia e ujit të tepërt është i dëmshëm për këtë bimë.
Nuk rekomandohet ujitja e vonë (vonë në verë dhe vjeshtë) tek  kultivarët dyvjeçar të mjedrës (Willamette, Mikeer, etj,.), sepse frenohet pjekja e plotë e lastarëve dhe mos përgatitja e tyre për dimërim.

Mbajtja e tokës në hapësirën midis rreshtash: Toka në hapësirën midis rreshtave mund të mbahet e punuar ose e mbjellë me bimë barishtore. 
Prashitja në midis rreshtat bëhet 5 - 7 herë në vit, në thellësi 7 - 10 cm. Kur hapësira midis rreshtave mbahet tapet (e mbjellë me bimë barishtore) ai kositet disa herë gjatë vitit (sipas nevojës) në lartësinë 8 – 10 cm. 

Klikoni këtu nëse dëshironi të dini më shumë për Vjelja e prodhimit tek mjedra