Bimët dekorative preken nga një sërë sëmundjesh dhe kontrolli i tyre është i një rëndësie të veçantë për të garantuar mosprishjen e bukurisë së tyre.

Cilat janë sëmundjet kryesore që prekin bimën e mimozës (Albizia julibrissin)?

Fuzarioza e Mimozës 

Shkaktari: Fusarium oxysporum  f.sp. perniciosum.

Simptomat

• Shenjat e para lehtësisht të dukshme janë gjethet e zverdhura, të regjuara dhe të thara në një ose disa degë në fillim deri në mes të verës.
• Gjatë verës degët e prekura mund të zhvishen para kohe dhe mund të shkojë deri në tharje totale.
• Po të hapim lëvoren, do të dallojmë nxirjen e brendisë së trungut ose po ta presim, dallohen indet përçuese të dëmtuara  me ngjyrë kafe.
• Me kalimin e kohës sëmundja mund të shfaqet edhe me çarje të lëvores.
• Në disa raste, mund të formohen gomoza ose një lëng i bardhë, i shkumëzuar me një erë të fermentuar mund të rrjedhë nga çarjet.
• Pas tharjes së pjesës mbitokësore të pemës, rrënjët mund të jenë ende të gjalla dhe lastarët mund të vazhdojnë të mbijnë nga baza e trungut për ca kohë.

Vyshkjet, tharjet e Mimozës nga verticilioza 

Shkaktari: Verticillium dahliae

Simptomat

• Sëmundja shfaqet me intensistet të lartë gjatë muajve Qershor-Korrik.
• Mbi vegjetacionin e bimëve në fazën e zhvillimit intensiv vihen re prania e një apo disa degëve me pamje jo normale me gjethe të zverdhura ose të thara në anët e tyre.
• Nganjëherë degët më të reja duken tërësisht të thara. Me pas simptomat agravohen dhe shpejt bima vyshket.
• Sëmundja favorizohet nga përdorimi i plehërimit të bollshëm azotik, ujitjet e shpeshta dhe të pa kontrolluara.

Menaxhimi i fuzariozës dhe i verticiliozës

• Mbjellja e kultivarëve rezistentë,
• Plehërim dhe ujitje e balancuar,
• Trajtime me Boscalid+ kresoxim- methyl,  Boscalid+ pyrclostrobin, captan, etj.  Shoqëruar me produkte plehërues që nxisin dhe rrisin rezistencën e bimëve ndaj sëmundjeve.

Klikoni këtu nëse dëshironi të dini më shumë Cilat janë sëmundjet kryesore që prekin bimën e dafinës ?