REGJISTROHUNI KËTU për të shfletuar rubrikat e tjera të platformës.

Tashmë kemi hyrë në stinën e nxehtë të verës shoqëruar me rritje të temperaturave të ajrit, ndaj është shumë e rëndësishme t'i kushtoni vëmendje të veçantë monitorimit të sjelljes së tufës suaj me qëllim që të siguroni hidratimin e duhur të saj dhe uljen e ndikimit të temperaturave të larta. Mjafton t’ju sjellim në kujtesë se në kushtet e stresit nga vapa lopët shprehin një frymëmarrje të përshpejtuar e të rëndë, në përpjekje për të ulur sadopak temperaturën e trupit të tyre. 

Menaxhimi i kafshëve në kushtet e rritjes së temperaturave të ajrit kërkon një planifikim të mirë të situatës, ndaj ju duhet t'i kushtoni rëndësi të veçantë parashikimit të motit. Mbi bazën e parashikimit të motit ju këshillojmë të zhvilloni një plan menaxhimi lidhur me ditët me temperatura të larta e deri në ekstreme për të siguruar që tufa juaj të trajtohet me hijezim dhe ujë të mjaftueshëm. 

Është përgjegjësi e juaja ose personave të ngarkuar për mbarëvajtjen e tufës që të përgatiteni mirë për ditët e nxehta duke siguruar mirëqenien e kafshëve. Kjo përfshin planifikimin e  infrastrukturës së fermës për të siguruar zona me hijezim dhe ajrosje, gjë që do të sjellë uljen e ndikimit të temperaturave të larta. Ndaj, ju këshillojmë që kafshët t'i kontrolloni rregullisht gjatë gjithë ditës për shenja të stresit nga vapa, t'i kushtoni vëmendje kontrollit të pikave të ofrimit të ujit për t'u siguruar që kafshët të kenë qasje në ujë të bollshëm e të freskët si dhe zonave të hijezimit, qarkullimit dhe ventilimit të ajrit. 

Mbani parasysh, se nëse lopët rrisin frymëmarrjen mbi 60 herë për minutë, ju duhet të filloni të shqetësoheni dhe të ndërmerrni masat e duhura.

Por, cilat raste përbëjnë rrezikun më të lartë të stresit nga vapa?

Rrezikun më të lartë të stresit nga vapa e shfaqin:

• Kafshët e reja.
• Kafshët me mantel me ngjyrë të errët.
• Kafshët e sëmura ose ato që kanë një historik të mëparshëm të sëmundjeve të frymëmarrjes.
• Lopët e qumështit me prodhimtari të lartë të cilat janë më të prekura nga nxehtësia ekstreme sesa ato me prodhimtari më të ulët.
• Lopët në laktacion janë më të ndjeshme se lopët në tharje për shkak të nxehtësisë metabolike shtesë të krijuar gjatë laktacionit.
• Gjedhi për mish me mantel të errët vuan më shumë nga rrezatimi i drejtpërdrejtë diellor sesa ai me mantel me ngjyrë të çelur, megjithëse ngjyra e çelur përbën rrezik të djegies nga dielli.
• Lopët Holstein janë më pak tolerante krahasuar me lopët Jersey.
• Lopët me peshë të madhe janë më të ndjeshme se ato me peshë të vogël.

Klikoni këtu nëse dëshironi të dini më shumë lidhur me Shenjat e Identifikimit të Stresit nga Vapa.