Kopra është perime me origjinë nga Azia perëndimore, e njohur dhe e përdorur për vlerat ushqimore dhe mjekësore nga grekët dhe romakët. Në mesjetë, u njohën vlerat ushqimore të saj dhe u kultivua edhe në Europën Qendrore. Në vendin tonë njihet gjerësisht dhe ka përdorim të kufizuar.

Përse kopra meriton të përhapet më shumë në vendin tonë ?

Kjo sepse: 

• Kjo bimë po gjen një përdorim të gjërë në guzhinë.
• Gjethet e saj mund të përdoren gjatë gjithë vitit në supra të ndryshme, sallata ose në prodhime të konservuara.
• Së fundmi, kopra po shfrytëzohet edhe nga industria kozmetike për prodhimin e sapunëve, parfumeve, detergjentëve, kremërave dhe solucioneve.
• Fijet e holla të koprës përmbajnë kalçium, mangan, hekur, e antioksidantë të cilët luftojnë inflamacionin dhe e mbrojnë trupin nga virozat.

Cilat janë kërkesat e koprës për klimën, tokën dhe parabimën?

Kopra është bimë e klimës së ngrohtë. I duron mirë temperaturave relativisht të ulëta, ndonëse mund t’i rezistojë për pak kohë edhe temperaturës -5°C. 

• Temperatura minimale e mbijetesës është -5°C
• Temperatura e përshtatshme e rritjes është 16-20°C
• Temperatura më e ulët për rritje e zhvillim është 4-5°C 

Kujtesë për kultivuesit e koprës!

• Temperaturat e larta mbi 25°C të vazhdueshme shkaktojnë lulëzimin e parakohshëm, duke dëmtuar prodhimin.

Në cilat toka shkon më mirë kopra?

Kopra mund të kultivohet në të gjithë tipet e tokave.

Pëlqen toka mesatarisht të lehta, të thella, të freskëta, të kulluara mirë dhe të pasura me lëndë organike, me pH 6-7. Nuk pëlqehen tokat e rënda dhe që kanë drenim të keq.

Cilët nga parabimët i përshtaten më shumë koprës ? 

Parabimë të mira për koprën janë të gjithë bimët që e lënë tokën të pasur me lëndë ushqimore si rezultat i plehërimit me pleh organik.

KUJDES! Duhet të mënjanohet mbjellja e koprës pas vetvetes dhe pas finokut. Është mirë që të mos rikthehet në të njëjtën tokë për 3-4 vjet. 

Si duhet të përgatitet toka për mbjelljen e koprës ? 

Për përgatitjen e tokës për mbjelljen e koprës duhet të kemi parasysh këto specifika: 

• Punimi i tokës

Përgatitja e mirë e tokës është e rëndësishme për të garantuar mbirje të mira, rritje dhe zhvillim normal të bimëve. Punimi i parë bëhet i thellë, rreth 30-40cm. Për një përgatitje të mirë të tokës kryhen dhe punime të tjera si diskime e frezime, deri sa toka të vijë në gjendje të mirë për mbjellje. Punimet e tjera synojnë të krijojnë një shtrat të shkrifët për mbirjen dhe zhvillimin normal të bimëve dhe luftimin e barërave të këqija.

• Kanalet kulluese dhe vaditëse

Pas punimit dhe frezimit të sipërfaqes së tokës, është e domosdoshme të përgatitet i gjithë sistemi i kanaleve kulluese dhe vaditëse. 

• Plehërimi i tokës

Me rëndësi për prodhimin e koprës është përdorimi i plehut organik të kalbur mirë në masën 60-70 kv/dyn, i cili përmbyset me punimin e tokës. Gjatë përgatitjes së tokës për mbjellje, shpërndahen edhe të gjithë llojet e plehërave kimike kryesisht fosforike, potasike.

Plehu azotik hidhet gjatë periudhës bimore.

Si përcaktohet sasia e plehërave që duhen përdorur tek kopra ? 

Kërkesat e koprës ndaj lëndëve ushqyese nuk janë shumë të larta.

Për një prodhim prej 20-25 kv/dynym, kërkon 12-15 kg/dynym azot (N), 8-10 kg/dynym fosfor (P2O5) dhe  10-12 kg /dynym potas (K2O).

Klikoni këtu nëse dëshironi të dini më shumë mbi Varietetet, mbjellja dhe kultivimi i koprës.