“ABA Online është një dritare informative për aktivitetin tim blegtoral”. 

Rrugëtimi për të promovuar një tjetër histori suksesi të fermerëve tanë, na ka çuar në Lezhë, në fshatin Balldren. Po ju prezantojmë me fermerin Lazer Gjoka, një blegtor punëtor që gëzon respektin e zonës. 

Z. Lazer e gjejmë në arë duke kullotur bagëtinë. Aktivitetin për mbarështimin e gjedhit, me qëllim tregtimin e qumështit për bulmet, Lazeri e ka nisur qysh në vitet 2000. “Lopët e mia ushqehen me kullota pastorale dhe ajër të pastër. Qumështi është organik dhe ka kërkesë të lartë nga klientët” krenohet Lazeri. Lazeri ka vendosur marrëdhenie kontraktuale me një tregtar në zonë, i cili grumbullon qumështin çdo mëngjes. Falë punës së tij, ambicjes për të shtuar aktivitetin, Lazeri gjithashtu tregon disavantazhet përse një investim i tillë duhet menduar me seriozitet.

Pas largimit të femijeve në emigracion, Lazeri i cili jeton vetëm me bashkëshorten, tregon se në zonë ka mungesa të fuqisë punëtore. Pandemia globale gjithashtu ka ndikuar direkt në frenimin e një investimi të tillë.

Për të ecur me hapin e kohës, Lazeri ka investuar në blerjen e një makinerie mjelëse dhe një ambjenti frigoriferik për ruajtjen e qumështit. Ai gjithashtu mbjell foragjere për bagëtinë, duke siguruar kështu ushqimin e bagëtive për gjithë vitin. Infrastruktura rrugore është gjithashtu e mire, dhe ferma blegtorale e Lazerit është në buzë të rrugës nacionale. Në një të ardhme, pasi të mbarështojë edhe bagëtine, Lazeri gjithashtu mendon të investojë në hapjen e një baxhoje për përpunimin e qumështit. Megjithatë, për shkak të pandemisë të gjitha këto plane investimi kanë ngelur vetëm në letër.

Nga ana tjetër, Lazeri është optimist. Qumështi i tij vazhdon të tregtohet në kohë edhe gjatë pandemisë dhe cilesia e qumështit është e lartë dhe organike. 

Aktiviteti i tij sa vjen e përmirësohet. Për konsum vetjak, Lazeri gjithashtu ka mbarështuar dele, derra, pula si dhe mbjell perime sipas sezonalitetit. Për ta ndihmuar në punen e tij të përditshme, nusja e Lazerit merret me punët e shtëpisë dhe përgatitjen e bulmetit për shtëpinë. Në ABA Online Lazeri shfleton online artikujt lidhur me rritjen dhe mirëqënien e gjedhit, foragjereve dhe aktivitetit të fermave blegtorale në përgjithësi.

I urojmë z. Lazer shumë suksese në punën e tij fisnike.