Kontrolli i kancerit bacterial në ulli është nga sëmundjet më të përhapura të ullirit në vendin tonë dhe sjell dëme të mëdha.
Përse duhet kontrolluar kanceri bacterial në kulturën e ullirit?

Ecuria biologjike 

• Bakteri është prezent në galet që nuk janë drunjëzuar plotësisht.
• Është vazhdimisht prezent në pjesën e jashtme të gjethes.
• Periudha me rrezikshmëri më të madhe për infeksion është në vjeshtë-dimër, kur rënia e gjetheve është më e madhe sepse ka shumë lezione.
• Periudhë e rrezikshme është dhe pranvera me ngrica të vonshme.
• Bakteri ruhet në tuberkola.
• Përhapet me anë të ujit dhe mizës së ullirit.
• Penetron nëpërmjet plagëve të provokuara nga agjentë biotikë (insektet) dhe abiotikë (breshëri, era) dhe në fruta nëpërmjet lenticeleve.
• Vjelja me goditje provokon shumë plagë që favorizojnë penetrimin e bakterit.

Shenjat e sëmundjes

Shenjat përfaqsohen nga gale (tumore) tipike të izoluara ose në raste të prekjeve të rënda, të bashkuara, në formë sferike, me diametër që ndryshon nga disa mm deri në disa cm.
Në fillim janë me ngjyrë të gjelbërt dhe me sipërfaqe të lëmuar e më vonë merr ngjyrë gri e më pas kafe, me sipërfaqe të ashpër dhe konsistencë drunore.
Tumoret mund të jenë të pranishme në gjethe, bishtat e gjetheve, si dhe më rrallë mbi fruta.

Dëmi
Dëmi i shkaktuar nga tuberkulozi është në varësi të sasisë së degëve të infektuara, i cili shkakton:

• tharje të pjesëve me tumore,
• dobësim të bimës
• pakësim ose mungesë të prodhimit.

Frutat në degët e infektuara janë të idhta dhe japin një vaj të nje cilësie të keqe. 

Kontrolli i patogjenit 
Masat e kontrollit

• Kontrolle sanitare të kujdesshme të bimëve mëmë, si dhe në fidanishte.
• Kontrolle sanitare të kujdesshme në fidanishte.
• Eliminimi i degëve të infektuara rëndë
• Trajtime me preparate me bazë bakri në mënyrë të veçantë mbas ngricave, breshërit, krasitjeve dhe vjeljeve mekanike.

Kujdes! Të bëhet së paku një trajtim giatë vjeshtës, periudhë në të cilën ka rënie më të madhe gjethesh dhe gjatë dimrit kur është rreziku më i madh për ngrica.

Etiketat: Teknologjia_e_ prodhimit, Këshilla_për_inpute, Këshilla_për_rritjen_e_efikasitetit, Këshilla_për_rritjen_e_sasisë,
Këshilla_për_rritjen_e_cilësisë, Rregulloret_e_cilësisë,  Krasitja, Trajtimi_i_sëmundjeve, Parandalimi_i_sëmundjeve, Ulliri