REGJISTROHUNI KËTU për të shfletuar rubrikat e tjera të platformës.

Ngrohja (djegia) e barit të thatë ul cilësinë e tij sikurse dhe krijon rrezikun e zjarrit në vend-ruajtje. Kur temperatura e barit arrin në nivelin rreth 50°C, vlerat e tij ushqyese dhe tretshmëria ulen në nivele të pakthyeshme. 

Por, cilat janë nivelet e rrezikshme të temperaturave dhe ndikimi i tyre mbi cilësinë e barit?

• Temperaturat më të rrezikshme të ballave të barit janë ato mbi 85°C. Në kushtet e temperaturave të tilla, në balla krijohen ato që quhen pikat e nxehta ose xhepat e zjarrit. Bëni kujdes! Në këto temperatura do të përballeni me shfaqjen e zjarreve, ndaj duhet të mbani zonën nën vëzhgim dhe të kontrolloni lëvizjen e ajrit përreth zonës së barit.
• Temperaturat e ballave të barit 75°C – 85°C janë temperatura shumë të rrezikshme dhe me një risk të madh për të shkaktuar zjarre. Ju rekomandojmë të mbani nën kontroll zonën përreth depozitimit të barit.
• Temperaturat e ballave të barit 65°C – 75°C janë temperaturat kur bari konsiderohet të ketë hyrë në zonën e rrezikut. Në këtë rast ju rekomandojmë të bëni shkëputjen e ballave nga njëra- tjetra me qëllim qarkullimin e ajrit dhe ftohjen e barit.
• Temperaturat e ballave të barit 55°C – 65°C, janë temperatura kur bari fillon të ndryshojë ngjyrë duke marrë ngjyrë të kaftë. Në këtë rast vlerat ushqyese të barit ulen ndjeshëm.
• Temperaturat e ballave të barit 45°C – 55°C, janë temperaturat kur ndodh një fermentim jo normal. Në këtë rast nxehja e barit ul nivelin e tretshmërisë së proteinës, fibrës dhe karbohidrateve.

Cilësia e barit ka një efekt të padiskutueshëm mbi mirëqenien e kafshëve. Cilësia e tij është tërësisht e lidhur jo vetëm me sasinë, por edhe me cilësinë e qumështit. Kafshët përgjithësisht kanë një tolerancë të ulët ndaj cilësisë së ushqimit, ndaj cilësia është e lidhur tërësisht me fitimin në fermë. Mjafton t’ju rikujtojmë se nga ngrohja (djegia) e barit humbjet në peshën e ballave mund të arrijnë nga 18% deri në 30%, në varësi kjo nga pasha e ballave si dhe përbërja e barit (bar jonxhe ku efekti i humbjes është më i vogël, ose bar livadhi ku efekti i humbjes është më i madh). 

Ndaj, mbani parasysh: Mos i ushqeni lopët me ushqime të nxehta. Lopët e pëlqejnë ushqimin e tyre sa më të freskët! 

Klikoni këtu nëse dëshironi të dini më shumë lidhur me Si të përballojmë problemet që shfaqen nga ngrohja (djegia) e ushqimeve.