Përse domatja ka njëpërhapje më të madhe se perimet e tjera?

• Përdorimi i domates është i  shumëanshëm.
• Vendi ynë ka kushte shumë të përshtatshme klimatiko-tokësore për kultivimin e saj.
• Fermeri siguron të ardhura të kënaqshme për një periudhë të shkurtër kohoreCilat janë kërkesat për klimën, tokën dhe parabimën?

Domatja përfshihet në bimët me origjinë nga vendet me klimë të ngrohtë kështu që kjo bimë bën pjesë në grupin e perimeve ngrohtësidashëse. 
Disa nga kërkesat termike më kryesore, në mënyrë të përmbledhur janë:

• Temperatura minimale jetësore =>0-2°C
• Temperatura biologjike (ose aktive) =>8-10°C
• Temperatura optimale e natës =>13-16°C
• Temperatura optimale e ditës =>22-26°C
• Temperatura minimale e mbirjes =>12°C
• Temperatura minimale për lulëzim => 18°C
• Temperatura minimale për pjekje =>23°C
• Temperatura optimale e tokës=>12-22°C

Domatja shkon mjaft mirë në tipe të ndryshme tokash, por më tepër ajo pëlqen tokat me pjellori mesatare deri në të pasur me lëndë ushqyese. Kërkon toka të freskëta, të kulluara,me përbërje mekanike rano-argjilore, të ajrosura mirë, me ph asnjanës ose lehtësisht acid. Toka të drenazhuara shkojnë shumë mirë për domaten sepse kullimi i menjëhershëm i ujit nga toka ndikon më së miri në rritjen e shpejtë të bimëve, frutifikimin dhe pjekjen e prodhimit.

Si parabimë, domatja shkon shumë mirë nëse ajo mbillet pas drithrave si gruri dhe misri për arsye se ato e lënë tokën të pasur dhe të pastër nga barërat e këqia dhe të shkrifta. Gjithashtu parabimë të mira janë bimët bishtajore. Ndërsa pas vetes (përfshirë edhe të  gjithë llojet e bimëve të familjes solanace), domatja nuk duhet të mbillet, sepse ato preken po nga të njëjtat sëmundje dhe dëmtues.
Vetë domatja është parabimë shumë e mirë për të gjithë llojet e perimeve, përveç atyre që janë në familjen solanace si:speci, patllixhani, patatja,etj.

Klikoni këtu nëse dëshironi të dini më shumë mbi Varietetet e Domateve në fushë.