Lakra kokë është kultura më e rëndësishme në grupin e bimëve të familjes kryqore dhe një nga më të rëndësishmet e perimeve te dimrit. Origjina e lakrës konsiderohet Europa Perëndimore dhe vendet që ndodhen në brigjet e Mesdheut. Në vendin tonë lakra kultivohet kryesisht në Ultësirën Perëndimore.

Përse lakra po gjen përhapje  në vendin tonë? Kjo sepse:

• Frutat e lakrës po gjejnë përdorim të gjerë në kuzhinat tona si e freskët, gatim gjellësh ose në formë sallate. Ato përmbajnë: ujë rreth 94 %, L.Th. 8 %, proteina 1.2 %, celulozë 1 %,  lëndë minerale 1 %, 3.29 % lëndë eksraktive, yndyrna 2.29 % etj. Lakra është mjaft e pasur në vitaminën C në vlerat 60 - 70 miligramë, 100 gr masë të freskët, 0.3 miligram vitaminë A. Lakra është e pasur me kripra minerale si Ca, Ka, Na, S etj.
• Vendi ynë ka kushte shumë të përshtatshme klimatiko-tokësore për kultivimin e lakrës sidomos vendet e ulëta dhe bregdetare.
• Lakra ka aftësi të mira prodhuese dhe efektivitet ekonomik, fermeri siguron të ardhura të kënaqshme.

Cilat janë kërkesat e lakrës për klimën, tokën dhe parabimën?
Lakra, është bimë e klimës së freskët dhe të lagët. 

• Temperatura optimale e mbirjes është 25°-30°C
• Temperatura më e ulët biologjike është 5°C
• Temperatura më lartë biologjike është 35°C
• Temperatura më e efektshme e rritjes është 15°0-18°C 

Në mbjelljet në kushte të temperaturës së përshtatshme, mbirja realizohet për 4-6 ditë.

REKOMANDIM!
FERMERI QË VENDOS TË MBJELLË LAKRËN KOKË, DUHET TË KETË PARASYSH KËTO VEÇORI:

• Temperatura minimale e rritjes është deri në 5°C.
• Lakra kokë është bimë që pëlqen ndriçimin e plotë dhe lagështirë e lartë ajrore.
• E rëndësishme është që temperatura e ditës të mos jetë më e lartë se 25°C.
• Temperaturat më të mira janë 15°-18°C.
• Lakra është bimë kërkuese ndaj ujit. Nevojat më të mëdha i ka gjatë mbjelljes në fushë dhe në fazën e formimit të kokës.
• Rritet mirë kur lagështira ajrore është në vlerat 80 - 90 %
• Teprica e plehërimit me azot, ka ndikim negativ në prodhimin e lakrës kokë sepse rrit përqindjen e çarjes së kokave.

Në cilat toka shkon më mirë lakra?

• Lakra parapëlqen toka të thella, të pasura, të freskëta, të kulluara mirë me ph 6.5-7.2.
• Në tokat me reaksion acid, ulet prodhimi pasi rritet ndjeshmëria e bimëve ndaj hernies së lakrës.
• Për prodhime të hershme tokat ranore janë më të përshtatshme, mjafton të jenë të pasura me lëndë organike dhe elementë ushqyes.

Në tokat që mbajnë lagështi, kryesisht gjatë dimrit, mund të lindin probleme të asfiksimit të sistemit rrënjor, prandaj Rekomandohet! Një sistemim i mirë i tokës dhe kullim i përsosur i saj.

Cilët nga parabimët i përshtaten më shumë lakrës? 

• Lakra kokë mund të mbillet mbas grurit, gramoret e tjera, por edhe pas perimeve të tilla si batha, bizelja, karrota, patatja e hershme etj.
• Duhet të shmanget kultivimi pas vetvetes dhe lakrave të tjera, pasi preket në masë nga një sërë sëmundjesh dhe dëmtuesish.
• Lakra, është mirë që të rikthehet në të njëjtën ngastër, jo më parë se 3-4 vjet.

Klikoni këtu në se dëshironi të dini më shumë për Si duhet të përgatitet toka për mbjelljen e fidanave të lakrës