Cila është struktura varietore e rekomanduar?

Kultivarët më të përshtatshëm të ruketës janë:

• Kultivarë të ruketës së kultivuar.
• Kultivarë të ruketës së egër.

REKOMANDIM! FERMERI QË VENDOS TË MBJELLË RUKETË, DUHET TË KETË PARASYSH KËTA VEÇORI TË SAJ:

• Kërkesat ujore të ruketës janë të larta. Me shtimin e sipërfaqes gjethore rriten edhe kërkesat për ujë. Nevojat më të larta i ka gjatë mbjelljes në fushë dhe në fazën e formimit të plotë të rozetës gjethore, veçanërisht kur kultivohet në periudhën pranverë-verë dhe verë-vjeshtë.
• Gjatësia e periudhës bimore shkon rreth 50-80 ditë, në varësi të teknikës së kultivimit dhe veçanërisht kushteve të temperaturës dhe fotoperiodës së periudhës në të cilën bëhet kultivimi.
• Teprica e plehërimit me azot ka ndikim negativ në cilësinë e prodhimit të ruketës

Cila është Teknologjia e Kultivimit të Ruketës ?

Cilët afate mbjelljeje rekomandohen në fushë ?

Ruketa mbillet drejtpërdrejtë me farë.

Mbjellja kryhet duar-duar, gjatë periudhës shkurt-shtator, me dorë (në sipërfaqe të vogla) ose me makinë mbjellëse në sipërfaqe më të mëdha.

Sa duhet të jenë distancat e mbjelljes?

Mbjellja e ruketës bëhet me rreshta në largësi 30 cm. Në mbjelljet me rreshta përdoret sasi më e pakët fare, 0.5-1kg/dynym, ndërsa në mbjelljet me dorë, me shpërndarje, nevojitet sasi më e madhe fare. Thellësia e mbjelljes është 2-3 cm. Në kushte normale duhet të sigurohen 70-80 bimë/m2.

Çfarë shërbimesh agroteknike kryhen për ruketën në fushë ?

Shërbimet agroteknike më të rëndësishme që kryhen gjatë vegjetacionit për ruketën janë; 

• Luftimi i barërave të këqija të cilat mund të shkulen me dorë (në sipërfaqe të vogla), me prashitje ose me trajtime kimike.
• Shkrifërimi i tokës 
• Plehërimi plotësues. Me pleh azotik në doza të ulëta. Ky shërbim fillon kur ka dalë çifti i parë i gjetheve të vërteta.
• Ujitjet sipas nevojave duke ruajtur lagështinë e përshtatshme. 

SËMUNDJET DHE DËMTUESIT E RUKETËS NË FUSHË TË HAPUR

Ruketa ka periudhë të shkurtër bimore. Normalisht nuk preket nga sëmundjet e për rrjedhojë nuk lind nevoja të merren masa për mbrojtjen e bimëve prej tyre. Ajo në vite të veçantë, mund të dëmtohet nga insektet, kryesisht nga afidet, për të cilat merren masa luftimi si duke pastruar barërat e këqija afër parcelës të mbjellë me ruketa pasi bëhen mbartëse të afideve si dhe më rrallë përdorimin e preparateve kimike duke i përdorur me kujdes dhe jo afër periudhës së vjeljes, me insekticide me veprim kontakti.

VJELJA DHE RUAJTJA E PRODHIMIT TË RUKETËS

Gjethet e reja të kësaj bime kanë një shije të veçantë në gatim dhe një aromë që e dallon nga sallata.

• Vjelja bëhet duar-duar duke hequr gjethet, kur ato kanë arritur një gjatësi rreth 15-20 cm. Kryhen 3-4 vjelje, në varësi të gjendjes së bimëve.
• Gjethet e prera vendosen nëpër arka plastike dhe dërgohen për tu pastruar dhe larë me ujë të pastër.

Pas vjeljes, këshillohet paraftohja në temperaturë nga 0°C deri +2°C dhe transporti në temperaturë të ulët (0 deri+5°C), për të mënjanuar zverdhjen dhe vyshkjen e gjetheve.

Ruajtja e prodhimit; 

Në lidhje me ruajtjen, ruketa ashtu si dhe sallata si rezultat i frymëmarrjes intensive, nuk qëndron për një kohë të gjatë në ruajtje. Prandaj ato duhet të dërgohen menjëherë në treg në jo më shumë se 1-2 ditë. Nëse bimët futen në qese plastike të vrimëzuara, ato mund të ruhen nëpër dhoma frigoriferike në temperaturën 2-3°C dhe lagështirën ajrore 95-100% deri në 10-12 ditë në mjedise me temperaturë 0 deri +1°C dhe lagështi ajrore 90%.