Si në gjithë pemëtoret puna fillon me sistemimin sipërfaqësor dhe disiplinimin e ujërave.
Sipas pjerrësisë e relievit të tokës masat që merren për sistemin sipërfaqësorë janë:

• Në toka fushore, thjeshtë bëni nivelimin sipërfaqësor dhe mbjellja mund të bëhet në vllaja (ngritjen e dheut);
• Në toka me pjerrësi 10 – 25% bëni sistemin e tokës me tarraca me ulje graduale;
• Në toka me pjerrësi 25 – 55% bëni tarracimin e tokës, prita me mure guri të thatë, ndërtoni mezhda dheu, gardhe druri. Këto do të mbrojnë tokën nga erozioni.

Disiplinimi i ujërave: Kajsia është shumë e ndjeshme ndaj tepricës së lagështirës në tokë. Prandaj merrni masa për disiplinimin dhe sistemimin e ujërave sipërfaqësore e ato nëntokësore. Kontrolloni e sistemoni rrjetin e kanaleve kullues për të larguar ujërat e tepërta të reshjeve dhe uljen e nivelit të ujërave nëntokësore në thellësinë më poshtë se 1.5 m.

Punimi i tokës dhe plehërimi bazë tek kajsia
Punimi qilizmë bëhet në thellësinë 70-120 cm. Koha më e mirë e punimit qilizmë të tokës është stina e Verës (konkretisht muajt korrik e gusht). Kur planifikoni të mbillni një pemëtore me nënshartesa vegjetative nuk këshillohet të bëhen punime të thella (sepse ato nuk zhvillojnë sistem rrënjor  më shumë se 50 cm thellësi).
Plehërimi bazë: Në plehërim rekomandohen të hidhen: 500 - 600 kv/ha pleh organik, 40 - 60 kg/ha lëndë aktive P2O5, dhe 80 - 150 kg/ha lëndë aktive K2O kryesisht në formën e sulfatit te potasit. Përdor sulfatin e hekurit në tokat gëlqerore që janë të varfra në hekur. 

Distancat e mbjelljes
Varet kryesisht nga forma e mbajtjes së kurorës, pjelloria, relievi i tokës  dhe mundësia e ujitjes. 

Cilësia e  fidanit, përgatitja e tij  për mbjellje dhe mbjellja
Cilësia e fidanit: Mundësisht siguroni fidan të cilësisë së parë. Ai duhet të plotësoi këto kritere:

• Fidani të jetë me nënshartesë vegjetative të njohur;
• Lartësia e fidanit të jetë mbi 120 cm;
• Trashësia, 5 cm mbi pikën e shartimit, të jetë 18 mm;
• Sistemi rrënjor të jetë xhufkor dhe me zhvillim të mirë;
• Gjatësia e copës së nënshartesës të jetë 30-40 cm i gjatë;
• Fidani të jetë i drejtë dhe kurorë të pa formuar;
• Fidani të jetë i pa prerë (pincuar) në majë;
• Të jetë i pajisur me certifikatën fitosanitare;

Në etiketë të jetë vendosur: lloji, kultivari, nënshartesa, kategoria, sasia e fidanëve në tufë, emri i prodhuesit, standardi, etj.
Përgatitja e fidanit për mbjellje: Sistemit rrënjor shkurtohet deri në 25 cm gjatësi. Fidanët futen në ujë të rrjedhshëm, një ditë para mbjelljes, për 15-20 orë me qëllim që ato të marrin sasinë e ujit që kanë humbur gjatë kohës së ruajtjes/shtratifikimit, apo transportit të tyre. Trupi dhe rrënjët e fidanit, para mbjelljes, është mirë të dezinfektohen me lëng bordolez 1%.

Pika e shartimit vendoset rreth 15 cm mbi sipërfaqen e tokës. Ngjishe fidanin më tokën që të krijohet një kontakt sa më i mirë i rrënjës me dheun për të siguruar një zënie sa më të lartë. Vendos një mbështetëse/hu për të mbajtur sa më drejtë pemën. Vendose fidanin në thellësinë që ka qenë në fidanishte dhe pikat e shartimit të fidanëve të jenë në një lartësi (siguron uniformitetin e pemëtores tuaj). Koha më e përshtatshme për mbjellje janë muajt nëntor- dhjetor kur bima është në qetësinë dimërore.

Kujdes! Në rastet kur përdoren plehra organike e kimike gjatë mbjelljes sigurohu që sistemi rrënjor të mos kontaktojë direkt me plehrat sepse kontakti i tyre me rrënjën rrezikon tharjen e fidanit.

Klikoni këtu nëse dëshironi të dini më shumë për Format e kultivimit tek kajsia