REGJISTROHUNI KËTU për të shfletuar rubrikat e tjera të platformës.

Hiri është një sëmundje shumë e rrezikshme që prek perimet e serës në përgjithësi dhe sidomos ato të familjes cucurbit, ku bën pjesë edhe kastraveci. Kjo sëmundje shkaktohet  nga Podosphaera xanthii. Ajo shpërndahet shpejt, që nga momenti që shfaqet, nëpërmjet ajrit dhe çon në dëmtime të rënda të gjetheve, humbje të mëdha të prodhimit, ulje të cilësisë e deri në tharjen e plotë të bimës së kastravecit. Në kushte klimaterike që favorizojnë hirin, mund të dëmtohen sipërfaqje të mëdha brenda një jave. 

SIMPTOMAT

Simptomat e hirit në bimët e kastravecit janë si më poshtë:

• Njollat e bardha rrethore, mund të formohen fillimisht në sipërfaqet e sipërme por, mund të kalojnë edhe në ato të poshtme të gjetheve dhe të zgjerohen shpejt në njolla më të mëdha. Këto njolla mund të mbulojnë të gjithë sipërfaqen e gjetheve dhe kërcellin.
• Gjethet e reja janë më të ekspozuara ndaj dëmtimit.
• Gjethet mund të përdridhen, ç’formëzohen dhe të shkëputen nga kërcelli.
• Kur hiri infekton pjesën më të madhe të gjethit, bima bëhet e dobët dhe fruti piqet para kohe. Frutat mund të digjen nga dielli.

ZHVILLIMI I SËMUNDJES

Hiri favorizohet nga temperatura 15-27°C dhe lagështia e lartë. Temperaturat mbi 32°C e ndërpresin zhvillimin e infeksionit. Në përgjithësi, preken bimët në zonat nën hije sesa ato të ekspozuara në diell.  

KONTROLLI

Për kontrollin e vrugut, rekomandohet menaxhimi i integruar, i cili nënkupton një strategji të koordinuar që përfshin masat e mëposhtme:

1. Përdorni fidan të prodhuar vetëm në fidanishte.
2. Fidanët të jenë të pastër nga sëmundjet.
3. Përdorni varietete rezistente.
4. Merrni masa për ajrosjen sa më mirë të serrës.
5. Shmangni vaditjet nga sipër bimës. Vaditja të realizohet në mëngjesin e vonë, që t'i jepet mundësia bimës të thahet sa më shpejt.
6. Përdorni fungicide për parandalimin e sëmundjes dhe bëni rotacion të tyre për të shmangur krijimin e imunitetit.
7. Bëni kontroll për prekjen nga hiri cdo jave dhe më shpesh kur kushtet klimaterike e favorizojnë atë.
8. Bëni pastrim të serrës nga barërat e këqinj.
9. Evitoni zonat me hije gjatë kultivimit.