Siç e theksuam, me kalimin e kohës, shumica e kafshëve fillojnë të vetë kurohen sapo ato fillojnë të zhvillojnë antitrupat e virusit. Lythat zakonisht tkurren dhe shkëputen vetë nga trupi i kafshës pas disa muajsh. Por cilat do të ishin masat më efiçente të parandalimit të transmetimit të lythave?

Vaksinat mund të ndihmojnë në parandalimin e lythave tek gjedhët e pa infektuar më parë. Në instruksionet e përdorimit rekomandohen dozët specifike për viçat dhe kafshët e rritura si dhe një vaksinë përforcuese rreth 3-5 javë pas vaksinës së parë. 

Ju këshillojmë të mos përdorni tek kafshët e shëndetshme instrumenta apo paisje që janë përdorur tek kafshët e infektuara pa i dezinfektuar ato më parë. Kafshët e infektuara mund të mos kenë lytha të dukshme, por ato gjithsesi mund t'i kontaminojnë paisjet ose instrumentat e ndryshëm. Veçanërisht vëmendje i duhet kushtuar dezinfektimit të duhur të pincetave, paisjeve të matrikullimit, etj., përmes të cilit mundësohet parandalimi i përhapjes së virusit të lythave.

Bëni kujdes me izolimin e kafshëve të infektuara nga pjesa tjetër e tufës. Por, mbani parasysh se periudha e gjatë që kalon nga prekja deri në shfaqjen e shenjave nënkupton se edhe kafshë të tjera të tufës mund të jenë ekspozuar ndaj virusit.

Kushtojini vëmendje kontrollit të insekteve të cilat bëjnë përhapjen e virusit. Kontrolli i tyre shërben si një masë e mirë parandaluese për transmetimin e virusit ndërmjet kafshëve.

Përsa i përket trajtimit, ai duhet të bëhet në kohë pa lejuar përhapjen e mëtejshme dhe avancimin e lythave. Kujdes, kur shfaqen raste të rënda në fermë, duhet marrë në konsideratë deri edhe skartimi i kafshëve të prekura. Sidoqoftë trajtimet e lythave mund të përfshijnë disa mënyra si: 

• Lythat e mëdha mund të largohen përmes unazave të gomuara, ose duke e mpirë zonën e prekur me anestezi lokale dhe duke përdorur paisje të kastrimit. Kjo është një procedurë që duhet të ndiqet nga një mjek veterinar. 
• Në rastin e pranisë së disa lythave të vegjël rekomandohet veshje e thithës me solucion të përgatitur me bazë glicerine që shërben si një shtresë e trashë veshëse në formë kristalore, shtresë e cila kur fillon të plasaritet shkakton dhe dëmtimin e lythave. Kjo është një procedurë që duhet të ndiqet nga një mjek veterinar. 
• Përgatitja e një solucioni me përzierje 50% hipoklorit me 50% ujë (pra gjysëm sasi hipoklorit dhe gjysëm sasi uji) është gjithashtu e efektshme duke e spërkatur gjirin me një tretësirë të tillë. Kjo është një procedurë që duhet të ndiqet nga një mjek veterinar. 
• Përdorimi i azotit të lëngshëm. Veterineri ose tekniku i inseminimit artificial mund të përdorë azotin e lëngët mbi lythat për eliminimin e tyre.
• Lythat mund të largohen gjithashtu edhe përmes përdorimit të gërshërëve ose brisqeve kirurgjikalë. Kjo është një procedurë që duhet të ndiqet nga një mjek veterinar. 

Në këtë rast nëse shkaktohet gjakderdhje ajo mund të kontrollohet, duke përdorur nitrat argjendi. Gjithashtu përdoret spërkatës në plagë për të parandaluar problemet me insektet.