Këpusha e ulllirit është kthyer në një problem shqetësues, njohja dhe marrja e masave të kontrollit me kujdes është një domosdoshmëri për të ruajtur ekuilibrat e dëmtuesit.

Si është përshkrimi dhe biologjia e këpushës së ullirit (Aceria oleae (Nal.)?

• Këpushat e ullirit janë shumë të vogla dhe shumë të vështira për t'u dalluar. Gjatësia mesatare është 0.1-0.2 mm. 
• Kanë ngjyrë të verdhë të errët, të sheshta dhe në formë dardhe. 
• Kanë vetëm dy palë këmbë që janë të vendosura në pjesën e sipërme të trupit.
• Mashkulli i ngjan femrës por është më i vogël.
• Këpusha e ullirit dimëron si femër e rritur në pjesët e poshtme të gjetheve. 
• Në pranverë ajo vendos vezët dhe brenda një periudhe të shkurtër është e mundur të gjinden të gjitha stadet e zhvillimit mbi sytha dhe gjethe të reja. Gjatë periudhës së lulëzimit pjesa më e madhe e popullatës migron në lulëritë, në fillim mbi ovaret e luleve dhe më vonë mbi frutat e sapo formuara, ku normalisht vendosen mbi pjesën e sipërme të tyre. 
• Gjatë verës ato preferojnë pjesën e poshtme të gjethes. 
• Cikli i zhvillimit i këpushës, në temperaturë 21-25°C është nga 11 deri në 15 ditë. 
• Femra mund të vendosi nga 7-42 vezë gjatë një periudhe dy javore dhe mund të plotësojë 12-15 brezni në vit.
• Këpusha e ullirit preferon vendet e ngrohta, ullinjtë e rinj ose vegjetacionin e ri, i cili del mbas një krasitje të rëndë të ullirit. 
• Dëmtuesi preferon gjithashtu gjethet e reja dhe frutat që janë të ekspozuara më shumë nga dielli. 

Në vendin tonë, varieteti më i ndjeshëm është Kalinjoti. Në këtë varietet A. oleae gjendet e bashkëshoqëruar me këpusha të tjera si Dytrimacus athiasella Keifer dhe Tegolophus hassanii Keifer, popullatat e të cilave janë në numër më të vogël.

Klikoni këtu nëse dëshironi të dini më shumë Si është natyra e dëmit të këpushës së ullirit (A.oleae)?