Kloridea është një dëmtues shumë i rrezikshëm që në qoftë se nuk merren masa shkakton dëmtime të rënda deri në shkatërrim të plotë të bimëve. Prek shumë bimë, përveç domates apo pambukut nga ka marrë emrin. 

Pse përbën problem Kloridea për prodhimin e domates së fushës?

• Shkakton ulje të ndjeshme të prodhimit;
• Ulet vlera tregtare;
• Ulen të ardhurat për njësi prodhimi.

Gjatë vegjetacionit vërehen dëmtime të theksuara në frutat e domateve të shkaktuara nga Krimbi i boçes së pambukut (Heliothis armigera) ose Kloridea. 

Ky dëmtues është një lepidopter. 
Insekti i rritur është një flutur e vogël me ngjyrë të kaftë, e cila i vendos vezët mbi gjethe një nga një ose në grupe. 
Dëmet shkaktohen nga larvat të cilat janë polifage, që prekin misrin, pambukun, duhanin, fasulen, bathën, patllixhanin, specin, pataten, sallatën, por më tepër domaten. 

Kujdes ! Dëmet e shkaktuara nga larvat në domate janë brejtja e gjetheve, shkatërrimi i luleve, larvat futen në frut kryesisht nëpërmjet bishtit, duke formuar fole 1-2 mm diameter, nga të cilat dalin dhe dëmtojnë frutat e reja, të cilat kalben dhe bien në tokë; kurse ato që janë duke u pjekur preken nga mikro-organizma kërpudhore e bakteriale dhe kalben.

Cili është cikli i zhvillimit të Klorideas ?
Ky dëmtues në varësi të kushteve klimatike shfaqet nga maji deri në shtator, por edhe më vonë, duke u zhvilluar deri në 4 gjenerata. 

• Fluturat dalin nga krisalidat dimëruese në fund të prillit dhe fillim të majit.
• Pas një jave çiftëzohen dhe çdo femër vendos mbi gjethe nga 300 deri në 2700 vezë. 
• Larvat dalin pas periudhës së inkubacionit, që zgjat nga 3 në 12-14 ditë, në varësi të kushteve të mjedisit dhe arrijnë pjekurinë për 11-15 ditë në temperaturë 25-30°C, duke kaluar 5-6 faza të zhvillimit.
• Një pjesë e madhe e tyre ngordhin gjatë fazave të para të zhvillimit, ndërsa në moshat e avancuara janë të shpeshta rastet e kanibalizmit.
• Larvat që kanë përfunduar zhvillimin zbresin në tokë, për t’u krisaliduar brenda një djepi të vendosur në thellësi 2-8 cm dhe fluturat dalin pas 2-3 javësh. 
• Cikli i zhvillimit të insektit varet shumë nga kushtet e mjedisit dhe se në kushte të favorshme një gjeneratë plotësohet për 35-40 ditë

Klikoni këtu nëse dëshironi të dini më shumë mbi masat e luftimit të krimbit të boçes së pambukut ose klorideas