Nga një vëzhgim dhe analizë e disa fermave të vogla të gjedhit me rreth 10-15 krerë, u evidentuan disa probleme të cilat janë të lidhura ngushtësisht me strehimin e papërshtatshëm, mungesën e lëvizjes së kafshëve, të ushqyerit e pamjaftueshëm dhe të pabalanuar, higjienën, riprodhimin e prodhimin. 

Më konkretisht fermat e marra në analizë përgjithësisht nuk kanë kapacitetin e duhur për strehim, stallat janë të vogla, të paventiluara, me shtrat të papërshtatshëm (përgjithësisht i shkurtër). Grazhdi i lopëve është i papërshtatshëm shpesh i ngushtë dhe i pamjaftueshëm për ushqimin individual të çdo lope. 

Në shumicën e rasteve mungon padoku i cili do të mundësonte lëvizjen e kafshëve dhe përmirësimin e shumë parametrave të përformancës së tyre e veçanërisht riprodhimit. Të ushqyerit shpesh është i njëanshëm, silazhi i misrit sigurohet vetëm për gjashtë muaj dhe nuk përbën një ushqim gjithëvjetor për tufën. Ka mangësi në rritjen e mëshqerrave pasi nuk ndiqet protokolli për të realizuar ndërzimin e parë si kombinim i moshës 14 muaj dhe peshës rreth 350 kg. 

Pirja e ujit realizohet përmes enëve të papërshtatëshme, me mundësi të kufizuara për pastrim duke u bërë shkas për shfaqjen e sëmundjeve bakteriale në fermë. Fermeri nuk merr pjesë në vendimmarrje përsa i përket riprodhimit e përmirësimit racor, ka raste kur mungon mbajtja e shënimeve, nuk njihet materiali i përdorur për inseminim si dhe në ndonjë rast as raca e përdorur. 

Shfaqen probleme me një servis periodë (periudha nga pjellja deri në inseminimin fekondues ose barrësues) të zgjatur, duke sjellë humbje të konsiderueshme në fermë. Krahas përpjekjeve që kushtohen për higjenën, ende ka probleme që lidhen me pastërtinë dhe higjenën e stallave, të kafshëve si dhe mos respektimin siç duhet të praktikave të mjeljes.     

Klikoni këtu nëse dëshironi të dini më shumë lidhur me Rekomandimet për Përmirësim.