Disa të dhëna të përgjithshme.

Ferma që analizohet mbarështon një tufë me 389 krerë nga të cilat dhi qumështi 180 krerë, keca 200 krerë dhe cjep 9 krerë. Përgjithësisht në çdo sezon pjellje në fermë lindin 99 keca femra dhe 101 keca meshkuj. Nga numëri total i dhive të qumështit (180 krerë), 160 prej tyre pjellin nga 1 kec dhe 20 dhi pjellin nga 2 keca. Duke qenë se ferma mbarështon 9 cjep, raporti i ndërzimeve është 1 cjap për 20 krerë dhi. 

Për plotësimin e nevojave ushqimore, praktika e ndjekur është:

• Ushqimi i kecave. Gjatë 30 ditëve të para pas lindjes, kecat ushqehen me qumësht. Më tej krahas qumështit në racionin ushqimor shtohet gradualisht misër 50 gr/krerë/ditë si dhe bar i thatë 100 gr/krerë/ditë deri në moshën 60 ditë (2 muajsh) moshë në të cilën kecat largohen nga ferma.

Supozojmë që në fermë, ka edhe dëmtime të të vegjëlve nga sëmundjet, grabitqarët, etj., ndaj në përllogaritje konsiderojmë për mbarështim 190 krerë keca. Në këto kushte: 

• Qumësht i konsumuar nga kecat për 60 ditë do të jetë: 

190 krerë x 60 ditë x 0.7 litra/krerë/ditë = 7,980 litra x 120 lekë/litër = 957,600 lekë.

• Misër i konsumuar nga kecat për 30 ditë do të jetë:

190 krerë x 30 ditë x 50 gr = 285 kg x 35 lekë/kg = 9,975 Lekë

• Bar i thatë i konsumuar nga kecat për 30 ditë do të jetë:

190 krerë x 30 ditë x 100 gr = 570 kg x 15 lekë/kg = 8,550 lekë 

Pra, për ushqimin e kecave do të shpenzohen gjithsej 976,125 lekë

• Ushqimi i dhive. Dhitë ushqehen kryesisht në kullotë, ndërkohë që gjatë periudhës së dimrit (për rreth 120 ditë) mbahen në rregjim stallor me misër 200 gram/krerë/ditë dhe bar i thatë me 1 kg/krerë/ditë. 

Në këto kushte shpenzimet për ushqim do të jenë:

• Kullotë, pagesë qeraje 50,000 lekë në vit
• Misër i konsumuar nga dhitë për 120 ditë do të jetë:

180 krerë x 200 gr /krerë/ditë x 120 ditë = 4,320 kg x 35 lekë/kg = 151,200 lekë

• Bar i thatë i konsumuar nga dhitë për 120 ditë do të jetë:

180 krerë x 1 kg/krerë/ditë x 120 ditë = 21,600 kg  x 15 lekë/kg = 324,000 lekë

Pra, për ushqimin e dhive do të shpenzohen gjithsej 475,200 lekë

Krahas sasive të sipër llogaritura, shtojmë edhe sasinë e ushqimeve për cjeptë si dhe rezervat ushqimore të nevojshme (kalbje, teprica nga mos konsumi, etj.), duke shtuar edhe: 

• Misër 500 kg x 35 lekë/kg = 17,500 lekë
• Bar i thatë 1,000 kg x 15 lekë/kg = 15,000 lekë.

Shpenzime në total 32,500 lekë.   

Krahas bazës ushqimore të përshkruar më lart, ferma ka edhe shpenzimet si më poshtë:

• Kullotë 50,000 lekë në vit
• Shërbim veterinarie dhe medikamente në vlerën 50,000 lekë në vit
• Mirëmbajtje stalle në vlerën 20,000 lekë në vit
• Fuqi punëtore në vlerën 750,000 lekë në vit
• Ujë 12,000 lekë në vit
• Energji 12,000 lekë në vit

Shpenzimet në total 2,377,825 si dhe 10% shpenzime të pa parashikuara (ose 237,782 lekë), krijojnë një shpenzim total prej 2,615,607 lekë. 

Ferma krijon të ardhura nga katër burime kryesore: shitja e qumështit, shitja e kecave, shitja e dhive të skartimit, si dhe shitja  e plehut, si më poshtë:

• Të ardhura nga qumështi: 

180 krerë x 150 ditë x 0.8 litër/ditë = 21,600 litër x 120 lekë/litër = 2,592,000 Lekë

• Të ardhura nga shitja e kecave:

190 krerë – 40 krerë (remont+konsum) = 150 krerë x 12,000 lekë/krerë = 1,800,000 lekë

• Të ardhura nga shitja e dhive të skartimit:

30 krerë x 8,000 lekë/krerë = 240,000 lekë

Një burim i mundshëm i të ardhurave është edhe plehu nëse ai tregtohet, në të cilin rast kemi përllogaritur një vlerë prej 20,000 lekë

Totali i të ardhurave është  4,652,000 lekë.

Më poshtë në tabelat respektive përmbledhëse listohen të ardhurat dhe shpenzimet të cilat ndihmojnë për përcaktimin e të ardhurave bruto, fitimit neto si dhe pikën kritike të çmimit të qumështit. 

Pra, totali i të ardhurave nga shitjet është 4,652,000 lekë, totali i shpenzimeve është 2,615,607 lekë. Vlera vjetore e amortizimeve dhe kredisë është 140, 000 lekë. 

Fitimi bruto përllogaritet nga të ardhurat total minus shpenzimet total, pra 4,652,000 - 2,615,607, që rezulton 2,036,393 lekë, ndërsa fitimi neto llogaritet nga fitimi bruto minus vlerën e amortizimit dhe kredive, pra 2,036,393 – 140,000 që rezulton 1,896,393 lekë. 

Fitimi i realizuar për litër qumësht përcaktohet nga fitimi neto pjestuar sasinë e qumështit të shitur pra 1,896,393 lekë pjestuar për 21,600 litra, rezulton 87.7 lekë, ndërsa pika e thyerjes së çmimit përllogaritet nga çmimi i shitjes minus fitimin për litër ose 120 – 87.7 lekë që rezulton 32.3 Lekë. 

Pra, çdo shitje qumështi me një çmim mbi 32.3 lekë rezulton që sjell fitim për fermën.