Udhëtojmë drejt fshatit Mashan në Gramsh. Takohemi me Z. Tafil Lumshi, fermerin shembullor të zonës. "Bashkëpunimin me FED invest e kam nisur shumë herët, qysh në 1996. Kam qenë një nga të parët kredimarrës në zonë, madje edhe kam vepruar si Kryetar Bordi në SHKK-të e para", tregon Z. Tafil plot emocion. 

Me profesion mjek veteriner, Z. Tafil është njohës shumë i mirë i zonës. Me shumë pasion tregon për zhvillimin e bujqësisë në dy kohët, para dhe pas viteve 1990, kulturat bujqësore dhe trendin për të ardhmen. E teksa ecnim për në arat e Z. Tafil, jemi mrekulluar nga vendndodhja piktoreske e fshatit, shtëpitë e rindërtuara bukur dhe bimësinë e pafund.  Z. Tafil tregon se fshati kishte rreth 130 familje. Kryesisht po investohej vrullshëm në bujqësi, duke parë kërkesën e lartë në treg për produkte organike.

Edhe pse me profesion mjek veteriner, Z. Tafil mbarështonte gjedh vetëm për konsum vetjak. Pasioni i tij i vërtetë është bujqesia, ku i kushtonte dhe gjithë kohën e lirë. Teksa vizituam arat e Z. Tafil, ishte lehtësisht e dallueshme puna kolosale dhe me shumë estetikë. 

Tre kulturat kryesore të z. Tafil ishin Livando, Ullishtja dhe Vreshtaria. "Jam një ndër të parët që kam kultivuar Livandon në zonën tonë. Rrushi është i varietetit për tu përpunuar dhe rakinë e nxjerr vetë. E tregtoj në lokale dhe restorante. Pandemia ka ndikuar disi në tregtimin e rakisë, pasi nuk ka pasur dasma të shumta këtë periudhë. Ullirin e tregtoj për konsum në tavolinë dhe pjesën tjetër për përpunim për vaj ulliri. Të gjitha shërbimet agro-teknike i realizoj vetë. Kurse, gjatë sezonit të vjeljes me ndihmojnë edhe punonjës sezonalë", tregon modestisht z. Tafil. 

E ndërsa na shpjegonte imtësisht, punët e sezonit për vreshtin apo ullishten mund të themi se Z. Tafil ishte bërë një agronom autodidakt.

I urojmë Z. Tafil shumë suksese në punën e tij fisnike si mjek veteriner dhe përgëzime për realizimin e pasionit të tij për zhvillimin e një aktiviteti të mirëfilltë agro-biznesi.