Përse ju inkurajojmë të zhvilloni biznesin e mbarështimit të dhive? 

Krahasuar me kategoritë e tjera të kafshëve të prodhimit, mbarështimi i dhive shfaq disa avantazhe:

• Së pari, ngritja e një biznesi për mbarështimin e dhive kërkon kapital dhe investime më të pakta krahasuar me biznese të tjera blegtorale, si për shembull biznesin e gjedhit. 
• Përkujdesja dhe menaxhimi i dhive janë lehtësisht më të përballueshme. 
• Mbarështimi i dhive është një ide shumë e mirë biznesi, pasi ka një kthim të mirë në vlerën e investimit. 
• Produktet e dhive, sikurse qumështi dhe mishi kanë një kërkesë të lartë në treg. 
• Ky biznes shpesh shërben në zonat rurale të pa zhvilluara si një mekanizëm për uljen e varfërisë dhe rritjen ekonomike.   

Tre nga faktorët më të rëndësishëm që ndikojnë mbi fitimin e një ferme që mbarështon dhi, janë kostot e të ushqyerit, numri i pasardhësve dhe çmimet e tregut për produktet e fermës. Natyrisht, ju si fermerë mund të keni kontroll mbi kostot e të ushqyerit duke rritur përdorimin e kullotave dhe efiçencën e të ushqyerit në kullota, prodhimin e koncentratës dhe barit të thatë në fermë me një kosto sa më të ulët, duke blerë ushqimet jashtë fermës në momentin kur ato ofrohen me çmimin më të favorshëm, duke ulur mbetjet nga mos konsumi apo prishja e ushqimeve, si dhe duke krijuar racionet e duhura ushqimore. 

Kostoja e dytë që konsiderohet më e larta në një fermë që mbarështon dhi është ajo e përkujdesit veterinar. Për uljen e kostove të tilla, ju si fermerë duhet të merrni njohuri dhe të fitoni eksperiencë për të përballuar vetë disa nga shërbimet veterinare siç janë vaksinimet, dehelmetizimet, përkujdesjen për thundrat, injeksionet, heqjen e brirëve, etj. Në këto kushte ju rekomandojmë të krijoni një ambient të posaçëm në fermë ku mund të ruani medikamentet dhe paisjet që lehtësisht mund të përdoren nga ju. 

Mbani parasysh se disa nga sëmundjet janë më lehtësisht të parandalueshme. Kështu, kujdesi për kullotat ju krijon mundësi të mbani nën kontroll parazitët e brendshëm, duke mundësuar që të mos shpenzoni në luftimin e tyre. 

Kostot e fuqisë punëtore janë një faktor tjetër që po bëhet gjithnjë e më i rëndësishëm dhe që ndikon në shpenzimet e fermës. Këtu duhet të përfshini si punën e paguar ashtu edhe të përllogarisni kontributin e pa paguar tuajin apo të familjarëve tuaj.

Mbani parasysh, se në fitimin e fermës suaj një ndikim të konsiderueshëm ka numri i pasardhësve të lindur në fermë si dhe arritja e shkurtimit të intervalit të pjelljes në më pak se 12 muaj për të rritur kështu efiçencën e riprodhimit. Në këtë rast përmes analizës ekonomike ju mund të përcaktoni nëse të ardhurat që duhet të krijoni nga shtimi i numrit të pasardhësve tejkalojnë shpenzimet në ushqim, shërbim veterinar dhe fuqi punëtore për numrin e shtuar të pasardhësve. 

Shitja e qumështit krijon një mundësi të mirë për gjenerimin e të ardhurave, por veçanërisht përpunimi i tij në djathë rrit potencialin për rritjen e mëtejshme të fitimit. 

Për të kryer analizën financiare të një ferme që mbarështon dhi, duhet të mbani parasysh se:

• Kostot operacionale variojnë në varësi të shkallës së prodhimit.
• Kostot e të ushqyerit përbëhen nga kostot e produkteve të prodhuara në fermë dhe atyre të blera jashtë fermës për të përmbushur nevojat ushqimore të tufës. Përllogaritja merr në konsideratë numrin e krerëve sipas kategorive (dhi qumështi, cjep, keca), numrin e ditëve nën ushqim, sasinë ditore të ushqimit dhe kostot nëse ushqimi është i prodhuar në fermë, ose çmimet respektive për çdo ushqim të blerë jashtë fermës.  (krerë x ditë x sasi ditore x kosto/çmim).
• Kostot veterinare përllogariten duke marrë parasysh numrin e krerëve sipas kategorive (dhi qumështi, cjep, keca), numrin e trajtimeve, si dhe koston për çdo trajtim. (krerë x numri trajtimeve x kosto).
• Fuqia punëtore në mbështetje të fermës përllogaritet duke konsideruar numrin e ditëve dhe pagesën për ditë pune. (numri i ditëve x paga ditore). 
• Në shpenzime përfshihen edhe përpunimi dhe marketimi i produktit si reklama, udhëtime, kontakte, etj. 
• Duhen përfshirë kostot e paisjeve, riparimeve, qerave, etj.      

Gjithashtu, mbani parasysh disa rregulla të përgjithshme si: 

• Madhësia e tufës – përfshin numrin total të krerëve përbërë nga dhitë e qumështit, kecat dhe cjeptë.  
• Numri i kecave është së paku i barabartë ose edhe më i madh se numri i dhive plleja.
• Numri i kecave femra dhe atyre meshkuj është pothuajse i barabartë.
• Numri i cjepve duhet të jetë i atillë që një cjap të mbulojë për riprodhim 18-20 krerë dhi.

Klikoni këtu nëse dëshironi të dini më shumë lidhur me analizën ekonomike të fermave që mbarështojnë dhi, nëpërmjet një shembulli të analizës ekonomike.