REGJISTROHUNI KËTU për të shfletuar rubrikat e tjera të platformës.

Kondicioni Trupor vlerësuar me pikë 1. Për këtë kondicion trupor duhet që: 

• Kurrizi të jetë i dallueshëm
• Kockat e gëngallës dhe shpatullës të dallueshme
• Brinjët qartësisht të dukshme
• Zona e kokës së bishtit e zhytur
• Konfiguracioni i skeletit i dallueshëm

Lopa në këtë rast është shumë e dobët fizikisht me të gjitha brinjët dhe strukturën kockore lehtësisht të dukshme. Lopët në kushte të tilla janë shumë të rralla dhe kjo ndodh vetëm në rastet e prekjes nga sëmundje të rënda dhe parazitizmi.

Kondicioni Trupor vlerësuar me pikë 2. Për këtë kondicion trupor duhet që:

• Kurrizi të jetë i dallueshëm
• Kockat e gëngallës dhe shpatullës të dallueshme
• Brinjët jo qartësisht të dukshme
• Zona e kokës së bishtit lehtësisht e zhytur
• Konfiguracioni i trupit kockor
• Lopa shfaqet lehtësisht e hollë, me brinjë të dukshme dhe me shtyllën kurrizore të dallueshme. Indi muskulor është i dukshëm ndërmjet shpatullave dhe të pasmeve.

Kondicioni Trupor vlerësuar me 3. Për këtë kondicion trupor duhet që: 

• Kockat e gëngallës të jenë lehtësisht të dallueshme
• Brinjët përgjithësisht jo të dukshme
• Zona e kokës së bishtit jo e zhytur
• Konfiguracioni i trupit pothusjse i lëmuar

Lopa konsiderohet me kondicion të moderuar. Dy brinjët e fundit mund të jenë të dallueshme dhe me pak prani të yndyrës. Gjithashtu gjurmë të lehta të yndyrës shfaqen edhe në pjesën e gjoksit, mbi brinjë ose rreth kokës së bishtit. 

Mbani parasysh se në pikëzimin e kondicionit trupor të lopës ndërmjet intervalit 2.75 deri në 3.25 rekomandohet tharja e lopës.

Mbani parasysh se në pikëzimin e kondicionit trupor të lopës ndërmjet intervalit 3.0 deri në 3.5 rekomandohet pjellja e lopës, ku niveli optimal i pikëzimit është 3.25.

Në të njëjtin interval të pikëzimit të kondicionit trupor rekomandohet edhe inseminimi i lopës, me vlerën ideale të pikëzimit 3. 

Nga pjellja në inseminimin barrësues siguroni që lopa të mos humbasë më shumë se 0.5 pikë.

Kondicioni Trupor vlerësuar me 4. Për këtë kondicion trupor duhet që: 

• Kockat e gëngallës të jenë të padukshme
• Brinjët të mbuluara mirë
• Zona e kokës së bishtit lehtësisht me gunga
• Konfiguracioni i trupit i rrumbullakosur

Lopa shfaq një pamje të rrumbullakosur në mënyrë të moderuar gjatë gjithë linjave të saj trupore. Një pjesë e depozitimit të yndyrës është e pranishme në pjesën e gjoksit dhe mbi kokën e bishtit. Pjesa e pasme duket e rrumbullakosur dhe dhjami mund të dallohet me prekje tek pjesa e brinjëve dhe rreth gëngallës.

Kondicioni Trupor vlerësuar me 5. Për këtë kondicion trupor duhet që: 

• Kockat e gëngallës të tregojnë depozitim dhjami
• Brinjët të jenë të mbuluara tërësisht
• Zona e kokës së bishtit me shumë gungë
• Konfiguracioni i trupit i fryrë nga dhjami

Qafa e lopës është përgjithësisht e trashë dhe e shkurtër dhe pjesa e kurrizit shfaqet më shumë në formë katrore për shkak të yndyrës së tepërt. Pjesa e kraharorit është e gjerë, ndërsa rreth kokës së bishtit krijohen vatra yndyre të theksuara. E tërë pjesa e poshtme e trupit do të jetë e mbuluar nga shtresat dhjamore përfshirë këtu edhe gjirin. Lopët fillojnë të shfaqin probleme me lëvizjen për shkak të peshës së tepërt dhe bllokimit të gjymtyrëve.