Vjelja e dardhëve është pak më ndryshe nga shumica e frutave të tjera, pasi ato duhet të vilen para se të piqen. Nëse piqen në pemë, ato piqen nga brenda jashtë, kështu që pjesa e brendshme bëhet e qulltë (shumë e butë) para se të piqet zona e jashtme. Në  këto raste ato dëmtohen lehtë dhe nuk i rezistojnë transportit.

Pra, dardhat duhet të vilen kur formohen plotësisht (fruti ka arritur madhësinë dhe formën e plotë të kultivarit), por jo të pjekura. Prandaj është e rëndësishme që pemëtorja të monitorohet, pothuaj, çdo ditë për të bërë (filluar) vjeljen në kohën e duhur.

Ekzistojnë katër mënyra themelore për të përcaktuar pjekurinë e një dardhe:

• Madhësia dhe forma. Duhet të jetë ajo e një dardhe të pjekur.
• Ngjyra. Kontrolloni çdo dy ditë dhe kur ngjyra e kokrrës fillon e zverdhet lehtësisht, është e gatshme të vilet.
• Ndjesia në të prekur. Një zbutje e lehtë e strukturës, nga shumë e fortë në të fortë (shenja të zbutjes).
• Lehtësia e këputjes. Dardhat duhet të këputen lehtë (kur ato kapen mes gishtave, rrotullohen lehtë dhe kthehen horizontalisht).

Procesi i vjeljes kryhet me dorë, duke përdorur shporta e mjete tjera të përshtatshme dhe ambalazhohet në arka plastike ose kartoni të forta.