Pjesët që mblidhen nga hithra janë : - rrënjët (Urticae radix); - gjethet (Urticae folium); - pjesa e sipërme e bimës 20-30 cm (Urticae her­ba). 

Vjelja realizohet nëpërmjet kositjes me mjete të mekanizuara apo me dorë (me drapër) apo kosë dore.  Hithrat duhet të kositen ose të vilen derisa janë të reja - rreth 30 cm të larta - zakon­isht korrja e parë përkon në mes të prillit. Korrja tjetër mund të bëhet brenda 20 ditësh. 

Hithrat nuk duhet të lejohen të zhvillojnë kër­cell të lartë dhe lulëzim. Bimët duhet të kositen të plota, të thahen dhe vetëm atëherë gjethet të ndahen. Nëse kositet në kohën e duhur, brenda një viti janë të mundshme 8- 10 kositje, kjo varet nga kushtet e kultivimit dhe masat agroteknike që kultivuesi ndërmerr gjatë periudhës vegjetative. 

Ndryshe nga kositja e gjetheve, rrënja duhet të nxirret me dorë ose në mënyrë të mekanizuar. Për nxjerrjen e rrënjëve përshtatet makina për shkuljen e patates. Rrënjët e nxjerra  duhet të pastrohen mirë dhe më pas të dërgohet për terje/tharje.

Terja/tharja dhe ruajtja e produktit

Hithrat mund të thahen natyrshëm, së pari në diell dhe pastaj tharja përfundon në një objekt të mbuluar pa prezencën e diellit direkt si dhe të ajrosur mirë. Hërë pas here masa e korrur duhet të rrotullohet për të realizuar një tharje të plotë dhe uniforme. Tharja mund të realizohet edhe në tharëse me kapac­itete të mëdha për 2 orët e para në një temperaturë prej 60°C, dhe më pas në një temperaturë prej 50°C. 

Për të mar­rë një kilogram hithra të thata, ju duhen 5 deri 6 kg të freskëta. 

Rrënja thahet ekskluzivisht në tharëse pasi kërkon një hapësire kohore më të gjatë për tharje.  Tharja jo cilësore mund të ndikojë në uljen e cilësisë së produktit.

Cili është rendimenti që mund të realizohet nga një hektar e mbjellë me hithër? 

Nga një hektari me hithër, zakonisht merren 10 - 15 tonë gjethe të freskëta ose 2-3 ton hithër të thatë. Rendimenti i rrënjës së freskët është nga 8 në 10 t / ha, ose 2.5 - 3.5 t / ha të rrënjës së hithrës së thatë. 

Pas tharjes dhe përpunimit, ndarjes së gjetheve nga kërcelli, materiali i përzgjedhur ambalazhohet, etiketohet dhe dërgohet në magazinim në kushte të favorshme të ruajtjes deri te finalizimi në treg. 

Duhet të dini që materiali i tharë është shumë higroskopik (e thith shumë lagështirën ajrore). Një lagështi e tillë e absorbuar/thithur do të ndikojë në shfaqjen/zhvillimin e mykut dhe dëmtimin e produktit. Ky produkt i mykur pastaj eliminohet nga tregu dhe humbjet mund të jenë shumë të mëdha. 

Rekomandohet që produkti i magazinu­ar herë pas here të kontrollohet dhe të vlerësohet cilësia e ruajtjes së produktit të magazinuar.