Përkujdesi për shëndetin është një pjesë e rëndësishme e menaxhimit të dhive. Menaxhimi i shëndetit përfshin të gjithë kategoritë qofshin dhitë barrëse, keca, apo ftuja. Ndjekja e protokollit të duhur dhe bashkëpunimi me veterinerin e zonës, ju mundëson shëndet të tufës, uljen e numrit të ngordhjeve tek të porsalindurit, pjellje të suksesshme, prodhim dhe riprodhim të kënaqshëm. 

Natyrisht, ju duhet të synoni parandalimin e sëmundjeve si masë fillestare dhe efiçente. Duke punuar mirë në drejtim të parandalimit, ju i siguroni tufës imunitetin e duhur dhe shëndetësim të sigurtë e të shpejtë. Kujdes, luftimi i sëmundjeve në fazat e tyre të avancuara, pa ndërmarrë masa parandaluese vetëm ju shton kostot e biznesit. 

Cilat janë disa shenja tipike që ju japin sinjalet se shëndeti i tufës suaj nuk është i duhuri? Vëzhgoni nëse dhitë në tufën tuaj shfaqin:

• Humbje të oreksit;
• Shkallë të ulët të dinamikës së rritjes;
• Jashtëqitje jo normale, të ujshme ose me prani gjaku;
• Bllokim të urinës;
• Rjedhje të sekrecioneve nga goja;
• Rrahje të shpeshta të zemrës;
• Një frymëmarrje të shpeshtuar;
• Kanë temperaturë të lartë;
• Përskuqje e syve;
• Rrjedhje apo lotim nga sytë;
• Shenja vetmije ose shkëputen nga tufa;
• Shenja hutimi dhe humbasin mprehtësinë;
• Rënie të qimeve.

Klikoni këtu në se dëshironi të dini më shumë për Sëmundjet më të Zakonshme të Dhive.