Gjithnjë e më shumë po ekspozohemi ndaj informacionit se ndryshimet klimatike përbëjnë një realitet me të cilin njerëzimi po përballet veçanërisht në dekadat e fundit. Në forma të ndryshme po përjetojmë ndikimet e këtyre ndryshimeve në jetën dhe aktivitetet tona të përditëshme. Padyshim aktiviteti human është faktori kryesor që ndikon në këto ndryshime duke përfshirë këtu përqendrimin e gazrave nga efekti serrë në atmosferë, shoqëruar kjo me rritjen e temperaturës mesatare që prej fillimit të revolucionit industrial, shtimin e rasteve të rrebesheve të furishëm e përmbytjeve. Gazi metan si dhe çlirimi i gazrave ndotës nga djegia e qymyrit dhe naftës, janë ndër faktorët kryesorë të ngrohjes globale. Rritja e temperaturës me mbi 1.1°C në nivel global po na ekspozon gjithnjë e më shumë ndaj valëve të të nxehtit, thatësirave, përmbytjeve, stuhive, uraganëve dhe zjarreve. 

Ja disa fakte të bazuara mbi matjet ndër dekada:  

• Përqëndrimi i gazit karbonik në atmosferë që prej Majit 2022 është më i larti në historinë e njerëzimit.
• Viti 2023 ka qenë viti më i nxehtë i rregjistruar ndonjëherë që prej vitit 1850 kur ka filluar matja e temperaturës, duke shënuar një rritje prej 1.18°C ndaj mesatares së temperaturës të shekullit të 20-të. 
• Rreth 20% e të gjitha çlirimeve globale të gazeve serrë janë rezultat i shpyllëzimit – kjo shifër tejkalon edhe çlirimet e gazrave nga të gjitha automjetet e pasagjerëve në planet.
• Si rezultat i ndryshimeve klimatike rreth 3.6 miliardë njerëz në planet po jetojnë në zona me rrezikshmëri të lartë si thatësirat, përmbytjet, valët e të nxehtit, ngjarjet ekstreme të motit dhe ngritja e nivelit të ujrave të detit.
• Lufta ndaj ndryshimeve klimatike dhe përmirësimi i jetesës në mënyrë natyrale kërkon zgjidhje natyrore, sikurse është rigjenerimi i pyjeve të degraduara.
• Ndaj, mbrojtja e natyrës dhe ruajtja e ekosistemeve ka rezultuar si masa më efiçente dhe efektive krahasuar me çdo ndërhyrje tjetër nga ana e njeriut.  

Klikoni këtu nëse dëshironi të dini më shumë lidhur me Ndikimin e ndryshimeve klimatike mbi blegtorinë dhe masat për përballimin e tyre.