Njollat bakteriale është një sëmundje që shkaktohet nga bakteri Pseudomonas syringae pv.dhe prek domatet e kultivuara në serrë. Ajo është e përhapur në të gjithë botën dhe ka një rrezikshmëri shumë të lartë për fermerët, sepse nga momenti që shfaqet është pothuajse e pamundur të luftohet. Kjo sëmundje redukton prodhimin, sidomos kur shfaqet në fazat e para të rritjes së bimës. Gjithashtu, kjo sëmundje ndikon në uljen e cilësisë kur prek frutin e domates duke e bërë atë të patregtueshëm.

SIMPTOMAT

• Simptomat e njollave bakteriale shfaqen në gjethe, kërcell, sepale dhe fruta.
• Në gjethe ato shfaqen si pika të rrumbullakëta me ngjyrë kafe në të zezë. Me kalimin e kohës, rreth këtyre pikave krijohet një kornizë e verdhë. Këto pika zhvillohen në të dy anët e gjetheve, por më shumë ato shfaqen në pjesën e poshtë tyre.
• Në kërcell këto shenja shfaqen në formë më të zgjatur.
• Në fruta shfaqen si pika të vogla në ngjyrë të zezë me kornizë ngjyrë jeshile të errët dhe nuk depërtojnë në thellësinë e tulit të frutit.

Duke qenë se shënjat e mësipërme ngjasojnë shumë edhe me sëmundje të tjera, diagnostikimi në laborator është i nevojshëm për përcaktimin e saktë të sëmundjes.

ZHVILLIMI DHE TRANSMETIMI I NJOLLAVE BAKTERIALE NË DOMATET E SERRËS
Njollat bakteriale shkaktohen nga bakteri Pseudomonas Syringae pv. Ky bakter transmetohet nga farat dhe fidanët e kontaminuar. Kushtet më të favorshme për zhvillimin e këtij bakteri janë temperaturat 18-23 gradë celcius dhe lagështia e lartë. Transmetimi I tij mund të bëhet nga vaditjet siper bimëve, duart e punëtorëve , veglat e punës etj. Ky bakter mund të mbijetojë gjatë gjithë dimrit në mbetjet e bimëve të sezonit të mëparshem ose në pjesë të ndryshme të serës.

KONTROLLI
Në momentin që bimët preken nga kjo sëmundje nuk ka asnjë mënyrë luftimi kundër saj. Edhe në rastet kur ndërhyhet me prerjen e gjetheve të infektuara, më shumë i japim zhvillim sëmundjes, sesa e ngadalsojmë atë. Në këto raste, ndërhyrja e vetme që mund të bëjmë është të shkulim plotësisht bimët e prekura dhe të mundohemi të shpëtojmë bimët dhe frutat e paprekur. Frutat e prekur nga kjo sëmundje nuk duhet të konsumohen.

Mënyra e vetme e luftimit të kësaj sëmundje është parandalimi i saj, i cili përfshin masat:

• Përdorni fara dhe fidanë të kontrolluar ndaj këtij bakteri.
• Kultivoni varietete rezistente.
• Bëni qarkullim kulturash
• Mos mbillni në atë serrë ku është shfaqur infeksioni bakterial
• Largoni dhe pastroni mirë serrën nga mbetjet e sezonit paraardhës.
• Bëni dezinfektim të serës në periudhën ndërmjet dy sezoneve
• Merrni masa sanitare për punëtorët, përdorni doreza dhe dezinfektoni veglat e punës.
• Mos bëni vaditje nga sipër bimëver
• Punoni me bimët vetëm kur ato të jenë të thara plotësisht nga lagështia.
• Bëni spërkatje me produkte me bazë bakri për parandalim dhe përsëriteni atë çdo 10-14 ditë në qoftë se koha është e ftohtë dhe me lagështi.