Sipërfaqja e mbjellë me lulelakër në vendin tonë përllogaritet mbi 300 ha. Zona më prodhuese është Ultësira Perëndimore. 

Lulelakra është bimë me origjinë nga zona bregdetare e Mesdheut, si: Qiproja, Italia dhe Egjipti. 
Lulelakra kultivohet me sukses edhe në zonën e ftohtë, kryesisht atë të Korçës dhe të Pogradecit.

Përse lulelakra ka gjetur përhapje në vendin tonë?
Kjo sepse:

• Lulelakra është mjaft e pasur në vitaminë C, vitaminё A, kripёra minerale shumё tё nevojshme pёr organizmin e njeriut.
• Vendi ynë ka kushte të përshtatshme klimatiko-tokësore për kultivimin e lulelakrёs, duke e bёrё tё pranishme nё treg gjatё gjithё vitit.
• Lulelakra ka aftësi të mira prodhuese dhe efektivitet ekonomik, fermeri siguron të ardhura të kënaqshme për një periudhë të shkurtër kohore.
• Përmban rreth 90% ujë, proteina 1.2 %, celulozё 1% dhe lёndё minerale 1%.

Cilat janë kërkesat e lulelakrës për klimën, tokën dhe parabimën?

• Temperatura optimale e mbirjes është 16°-22°C
• Temperatura më e ulët biologjike është 6°C 
• Temperatura më e lartë biologjike është 30°C
• Temperatura optimale e rritjes është 8°-18°C 

Nё mbjelljet nё kushte tё temperaturёs sё pёrshtatshme, mbirja realizohet pёr 3-4 ditё. Në vendin tonë lulelakra ёshtë bimё tipike e dimrit nё zonёn me klimë tё butё. Lulelakra ёshtë bimë që do lagështirë dhe freski ajrore e kjo më shumë në periudhën e mbirjes dhe në fazat e rritjes intensive dhe të formimit të kokës. Në mungesë të lagështirës koka nuk zhvillohet normalisht dhe rriten të deformuara ose mbeten të vogla dhe ulet shija e tyre.

Lagështira tokësore duhet të jetë 60 - 70%, ndёrsa lagështira ajrore duhet tё jetё 80 - 90%. Lulelakra i qëndron uljes së temperaturës deri në -3°C. Lulelakra ёshtë bimë e ditës së gjatë dhe me zgjatjen e dritës, ajo kalon shpejt në farё. Hijezimi në çdo fazë të zhvillimit të bimës, ndikon keq në rritjen normale të frutave, rendimentin dhe cilësinë e tyre.

REKOMANDIM!

Kultivarёt pёr prodhim tё vonshёm vjeshtor-dimёror, mbillen gjatё periudhёs sё verёs. Nё fazat e para tё zhvillimit tё bimёve ato kёrkojnё temperatura tё larta (20-25°C, si mesatare mujore), ndёrsa gjatё formimit tё kokёs, temperaturat nё vlerёn 10-15°C janё tё domosdoshme pёr tё prodhuar koka kompakte dhe me cilёsi tё mirё.

Pёr kultivarёt pёr prodhim veror, pёr tё prodhuar kokё edhe nё kushte tё temperaturave mё tё larta se 15-20°C, duhet qё t’u sigurohet sasi e mjaftueshme e ujit nё tokё dhe lagёshtisё relative tё ajrit.

• Lulelakra konsiderohet si bimё tolerante ndaj temperaturave tё ulёta, por duhet qё ato tё mos zgjatin shumё.
• Kultivarёt e hershёm tё lulelakrёs, nё kushte stresi termik dhe ujor, janё mё tё predispozuar ndaj dukurisё sё lulёzimit tё parakohshёm (gonxhimit), sidomos kur stresi ndodh gjatё fazave tё para tё periudhёs bimore.
• Prodhime mё tё mira nga lulelakra, merren nga zonat me klimё tё freskёt, me lagёshti dhe me mungesё tё ngricave. 

Në cilat toka shkon më mirë lulelakra?

• Lidhur me kёrkesat ndaj tokёs, lulelakra ёshtё bimё me kёrkesa tё pakta.
• Ajo mund tё kultivohet nё tё gjitha tipat e tokave.
• Pёr prodhim tё hershёm tё lulelakrёs, tokat e lehta janё mё tё pёrshtatshme, mjafton qё ato tё pasurohen me plehra organike.
• Pёr prodhim veror dhe vjeshtor tё lulelakrёs, mё tё pёrshtatshme janё tokat ranoargjilore, me aftёsi tё mira ujёmbajtёse.
• Nё tokat qё mbajnё lagёshti, kryesisht gjatё dimrit, mund tё lindin probleme tё asfiksimit tё sistemit rrёnjor, prandaj Rekomandohet! Njё sistemim i mirё i tokёs dhe kullim i pёrsosur i saj.
• Reaksioni i pёrshtatshёm i tokёs duhet tё jetё pH=6-6.8.
• Nё tokat me reaksion acid, lulelakra vuan nga mungesa e mikroelementit molibden dhe preket mё shpesh nga hernia e lakrёs.

Cilët nga parabimët i përshtaten më shumë lulelakrёs? 

• Lulelakra mund tё mbillet mbas grurit, barit pranveror, por edhe pas perimeve tё tilla si batha, bizelja, karrota, patatja e hershme etj.
• Duhet tё shmanget kultivimi pas vetvetes dhe lakrave tё tjera, pasi preket nё masё nga njё sёrё sёmundjesh dhe dёmtuesish.
• Lulelakra, është mirë që të rikthehet në të njëjtën ngastër, jo më parë se 3-4 vjet.

Klikoni këtu nëse dëshironi të dini më shumë sesi duhet të përgatitet toka për mbjelljen e fidanave të lulelakrёs.