Cila është struktura varietore e rekomanduar për bizelen?

Kultivarët që këshillohen të bizeles janë: 

• Në grupin për prodhim të hershëm që vilen 90-100 ditë pas mbjelljes në fushë: 
• Telefon
• Protor
• Atiroy
• Frostiroy
• Giroy

• Në grupin për prodhim të mesëm që vilen 100–110 ditë pas mbjelljes në fushë: 
• 8 Pop 
• Progres-9
• Granada
• Senator
• Eminent 
• Darfon

• Në grupin për prodhim të vonë: 
• Kokërrmadhja 
• Përparimi
• Avolo
• Spiket
• Hydra
• Alderma
• Vedro

• Në grupin për prodhim bishtaja: 
• Manxhatuta

Cila është Teknologjia e Kultivimit të Bizeles?

Bizelja mbillet drejtpërdrejtë me farë direkt në tokë. Pas përgatitjes së një shtrati sa më të mirë për farën dhe sistemimit sipërfaqësor të tokës, bëhet mbjellja e cila realizohet me makinë mbjellëse. 

Kur duhet të bëhet mbjellja e bizeles ?

Periudha e mbjelljes është në varësi të zonës së kultivimit, karakteristikave të kultivarit, përdorimit të prodhimit dhe më e rëndësishmja merret në konsideratë periudha që prodhimi ka çmim më të lartë në treg.

Mbjellja e bizeles në zonën e ngrohtë kryhet nga Tetori, në Shkurt.

Në zonën e ftohtë mbillet herët në pranverë në Shkurt-Mars. 

Mbas një përgatitje të mirë të tokës dhe sistemimit sipërfaqësor të saj, bëhet mbjellja e farës me makinë mbjellëse ose me dorë në sipërfaqe të vogla. 

Kujdes ! Thellësia e hedhjes së farës në tokë është 4-5 cm.

Cilat distanca mbjelljeje zbatohen për bizelen në fushë?

Distanca e mbjelljes së bizeles ndryshon në varësi të tipit bimor(e shkurtër ose e gjatë). Mbjellja bëhet me distanca në mes rreshtave 45-60 cm, për llojete shkurtëra dhe 80-120 cm për llojet kacavjerrëse.

Kujtesë! Sasia e farës që përdoret për një dynym është 15-20 kg. Kultivimi mund të jetë me kultivarët e shkurtër që nuk kanë nevojë për mbështetje dhe kultivarë kacavjerrës që kanë nevojë për mbështetje.

Çfarë shërbimesh agroteknike kryhen për bizelen?

• Në fillim të mbirjes merren masa në shkrifërimin e sipërfaqes me qëllim lehtësimin e daljes së bimëve.
• Rreth 7-10 ditë pas mbirjes bëhet prashitja e parë duke e shoqëruar me plehra azotike. Si bimë bishtajore, bizelja është azotazotofiksuese që fikson 14-50 kg për dynym azot. Në këtë kuptim mund të mendohet se nuk ka nevojë për plehërim me azot. Por, studimet tregojnë se kur bizelja mbillet mbas drithrave është e domosdoshme të plehërohet gjatë mbjelljes me sasi të ulta azoti.
• Prashitjet e tjera bëhen sipas nevojës deri në momentin e mbulimit të sipërfaqes nga vegjetimi i bimëve.

Ujitjet duhet të sigurojnë pandërprerje lagështirën e nevojshme në tokë, sidomos në periudhën më kritike, atë të lidhjes së bishtajave dhe formimit dhe rritjes së kokrrave në bishtajë.

Kujdes ! Streset që vijnë nga mungesa e lagështisë në tokë, sjellin dëmtime të pariparueshme në rritjen e zhvillimin e bimëve e për rrjedhojë në prodhimin e pritshëm të bizeles.

Kujdes i veçantë i duhet kushtuar shkriftërimit të tokës dhe luftimit të barërave të këqija.

Klikoni këtu nëse dëshironi të dini më shumë mbi Sëmundjet dhe dëmtuesit e bizeles, Parandalimin dhe luftimin e tyre, si dhe Vjeljen e bizeles dhe Ruajtjen e prodhimit të bizeles.