REGJISTROHUNI KËTU për të shfletuar rubrikat e tjera të platformës.

Ndonëse temperaturat e ulta kanë një ndikim të theksuar në jetën e shumë gjallesave, gjedhi sikurse dhe të imtat janë të mirë paisur me elementë që garantojnë tolerancën ndaj temperaturave të ulta, dëborës, akullit apo erës. Ato tolerojnë mjaft mirë edhe temperaturat që zbresin deri në -7°C apo -8°C.

Por, cilët janë faktorët që mundësojnë tolerancën ndaj temperaturave të ulta?
Së pari, do të përmendim këtu lëkurën. Ajo është shumë e ashpër e sëbashku me shtresën e qimeve krijojnë një mburojë të mirë izoluese në dimër.
Së dyti, rumeni përbën një tjetër faktor për përballimin e temperaturave të ulta. Vetë proçesi i tretjes, që siç e dini ndodh në katër dhoma të rumenit, prodhon nxehtësi. Ndërkohë që rumeni punon për të zbërthyer celulozën, mikrobet futen në funksion në mënyrë anaerobike (në mungesë ajri) duke çliruar gazra që mbajnë trupin e kafshës të ngrohtë. 

Sidoqoftë, mbani parasysh se rënia e mëtejshme e temperaturave shkakton edhe rënie të prodhimit të qumështit. Kjo ndodh pasi një pjesë e energjisë që nevojitet për prodhimin e qumështit, shkon drejt ruajtjes së temperaturës trupore. Ndaj, mëposhtë ju rekomandojmë disa nga masat që mund të ndërmerrni për përballimin e temperaturave të ulta. Masa të tilla përfshijnë:

• Qëndroni vazhdimisht të informuar lidhur me parashikimin e motit. Masat që do të ndërmerrni para rënies së ndjeshme të temperaturave janë gjithnjë më efikase sesa ato që do të ndërmerrni pasi ka ndodhur rënia e temperaturave!
• Siguroni bar të thatë në racionin ushqimor të kafshëve sidomos gjatë mbrëmjes më qëllim që të nxisni proçesin e ripërtypjes, sikurse dhe herët në mëngjes kur temperaturat janë shumë të ulta. Siç theksuam, ripërtypja shoqërohet me çlirim të gazrave që nxisin mbajtjen ngrohtë të trupit të kafshës. Në këtë rast, ju rekomandojmë që gjatë planifikimit të bazës ushqimore, të përllogarisni një rezervë apo shtesë prej rreth 20% të sasisë së barit të thatë që konsumohet normalisht në fermë, rezervë e cila do t’ju vijë në ndihmë në ditët tepër të ftohta.
• Siguroni hyrjen e kafshëve në periudhën e dimrit me një kondicion të mirë trupor. Ju rekomandojmë të mbani një kondicion ndërmjet 5-6 pikë, ku 1 është kondicioni i lopëve tepër të dobëta dhe 9 është kondicioni i lopëve tepër të dhjamosura.
• Në rastin e regjimit stallor, mundësoni lëvizjen e rregullt të kafshëve jashtë stallës, duke bërë kështu eliminimin e problemeve që mund të shkaktohen nga mungesa e ventilimit, ndër të cilat janë sëmundjet e frymëmarrjes (respiratore) si pneumonia.
• Kujdes i veçantë duhet treguar për të sapolindurit. Ruajini ambientet e marteniteteve nga rrymat e ftohta ajrore, siguroni një mjedis me temperatura optimale si dhe ventilimin e pastërtinë e duhur për parandalimin e pneumonisë dhe diarresë.
• Siguroni pastërti dhe higjienë në stallë duke pastruar jashtëqitjet e kafshëve në mënyrë të rregullt.
• Siguroni ujë të mjaftueshëm, të pastërt dhe në temperaturën e duhur. Duke siguruar ujë të vazhdueshëm edhe kur temperaturat zbresin nën pikën e ngrirjes, ju i mbani kafshët në gjendje aktive.
• Siguroni mbajtjen pastër të mjediseve nga balta, pasi ajo jo vetëm krijon problem me thundrat e kafshëve, por njëkohësisht pengon qëndrimin ngrohtë të kafshëve kur trupi i tyre ndotet dhe ndikohet nga balta.
• Gjatë periudhës me temperatura të ulta, kushtojini vëmendje kafshëve barrëse. Ndiqni protokollet e duhura sëbashku me veterinerin, mbajini kafshët barrëse në gjendje sa më të mirë shëndetësore gjatë dimrit, duke siguruar njëkohësisht edhe suplemente ushqimore.
• Siguroni rehatinë e kafshëve. Siguroni një shtrat të rehatshëm e të pastërt, gjë që mundëson reduktimin e stresit tek kafshët. Mbajtja e shtratit të pastërt e të thatë, ul ndikimin e motit të ftohtë. Bëni kujdes me lopët që milen gjatë periudhës së dimrit, ato duhet të mbahen nën kontroll të vazhdueshëm për dëmtime të thithave të gjirit. Ju rekomandojmë të përdorni kremëra për kurimin e plagëve të mundëshme të thithave dhe gjirit. Njëkohësisht, kushtojini vëmendje kurimit sa më të shpejtë të plagëve në pjesë të tjera të trupit.

Klikoni këtu nëse dëshironi të dini më shumë lidhur me Ujin dhe Rëndësinë e Tij në një Mot të Ftohtë.