Edicioni i III-të i Panairit Ndërkombëtar të Agrobiznesit dhe Agroteknologjisë AGROTECH Expo 2020, i organizuar nga Expocity Albania, do të zhvillohet në datat 13-14 mars, 2020. Ky panair ofron një platformë komunikimi biznesi për aktorët më të rëndësishëm kombëtarë, rajonalë e ndërkombëtarë, në sektorët e makinerive bujqësore, kimikateve, plehrave kimike, agropërpunimit, konservimit, magazinimit, ambalazhimit, paketimit të produkteve bujqësore dhe transportit, ushqimit organik dhe agroturizmit. Në një linjë me edicionet e mëparshme, AGROTECH Expo 2020 do të vazhdojë të japë kontributin e vet në zhvillimin e sektorit përmes: komunikimit të suksesshëm mes kompanive, ekspozimit të blerësve potencialë dhe takimeve B2B. Këto kanë për qëllim krijimin e mundësive të reja për prezantimin dhe promovimin e produkteve dhe shërbimeve në sektorin bujqësor, lidhjen e partneriteteve të reja, informimin mbi zhvillimet më të fundit në teknologjinë agrare dhe zhvillimin e politikave sektoriale. Në sajë të vëmendjes ndërkombëtare, AGROTECH Expo 2020, përmes eventeve të targetuara, forumeve dhe workshopeve informuese dhe edukative, do t’u ofrojë sipërmarrësve lokalë dhe rajonalë, dije dhe ekspertizë mbi depërtimin dhe rritjen në tregje të reja, shkëmbim njohurish specifike mbi sektorin, rrjetëzim, si dhe informim mbi mundësitë e rritjes së biznesit. Në Edicionin e II-të, AGROTECH Expo ka shënuar një rritje prej 45% të numrit të ekspozuesve në total dhe gjithashtu ka tërhequr vëmendjen e pjesëmarrësve nga rajoni dhe atyre ndërkombëtarë.

AGROTECH Expo 2020 është tashmë event anëtar i EURASCO-s (Federatës Europiane të Panaireve Bujqësore dhe Organizuesve të Eventeve) www.eurasco.org.

FORUMI AGROTECH 2020

Institucionet shtetërore kryesore, projektet në bujqësi dhe kompanitë lider të sektorit, do të shërbejnë si histori suksesi për potencialin e Shqipërisë në sektorin bujqësor. Në këtë kontekst, AGROTECH Expo 2020 do të mbledhë aktorët kryesorë për të diskutuar mbi çështjet më të rëndësishme që ndikojnë sektorin. AGROTECH Expo 2020 do të shërbejë si një kanal për shkëmbimin e informacionit, parashtrimin e strategjive dhe nismave për investimet dhe zhvillimet në bujqësi, duke prezantuar mundësitë më të mira për një zhvillim të qëndrueshëm.

Gjatë Edicionit të II-të të AGROTECH Expo, ne mirëpritëm në Shqipëri konferencën ndërkombëtare “Global G.A.P Stop Tour”, e cila pati një ndikim shumë të rëndësishëm në sektorin bujqësor përsa i përket informimit për certifikimet Global G.A.P.

BUJQËSIA NË SHQIPËRI

Bujqësia është një sektor prioritar në Shqipëri, me një kontribut të rëndësishëm në zhvillimin dhe rritjen ekonomike të vendit. Bujqësia është burimi kryesor i punësimit, veçanërisht në zonat rurale. Ky sektor gjeneron rreth 20% të GDP-së dhe mundëson 37% të punësimit në total. Sektori bujqësor në Shqipëri po shënon rritje të qëndrueshme duke kontribuar edhe në rritjen e prodhimit të brendshëm bruto. Kërkesa në rritje për ushqime të shëndetshme, organike, ka rritur ndjeshëm nevojën për përshtatjen ndaj teknologjive më të fundit dhe zgjidhjeve më efektive për transformimin e biznesit ne bujqësi, në mënyrë që të rrisë prodhimtarinë dhe t’i përshtatet nevojave të tregut. Industria e agropërpunimit në veçanti, ka patur një rritje të konsiderueshme gjatë 10 viteve të fundit. Ky sektor ka shënuar një rritje prej 3% në xhiron vjetore dhe një rritje prej 3.3% në punësim.